پاکستان - افغانستان اورته سیده خوفسیزلیک جلسه سی بولیب اوتدی

پاکستان تشقی ایشلر وزیرلیگی منشیسی تهمینه جنجوعه و قوروقلیک (زمینی) کوچلری قومندانی جنرال قمر جاوید بجوانینگ میزبانلیگیده پاکستان نینگ راول پندی شهریده گی قوراللی کوچلری قومندانلیگیده بولیب اوتگن خوفسیزلیک جلسه سیگه ، افغانستان ملی امنیت شوراسی باشلیغی حنیف اتمر، ملی امنیت باشلیغی معصوم ستانکزی، ایچکی ایشلر وزیری احمد برمک بیلن استخبارات ملازملری و یوقاری مرتبه لی اداره چیلر قتنشگن ایدیلر.

جلسه بیلن تیگیشلی بیریلگن یازمه بیاناتده، افغانستان تامانی نینگ تینچ لیک اوچون پاکستان لیک اداره چیلر آتگن آدیملرنی تقدیر ایتگنلری معلوم قیلینگن. عین دمده خوددی شو اوچره شووده افغانستان – پاکستان تینچ لیک و استقرار پلانی نینگ یقین تاریخده فعالیت گه اوتیشی توغریسیده توخته لگن لیگی بیلدیریلگن.

مذکور بیاناتده، "ایککی تامان هم خوفسیزلیک ساحه سیده همکارلیک نینگ دوام ایتیلیشی، فعالیت گروهی نینگ ایجاد ایتیلیشی، و زوروانلیک نینگ کمه یتیریش گه یاردمچی بوله دیگن چاره – تدبیر آلینیشینی قبول قیلدی" دیب ایتیلگن. شونده ی قیلیب افغانستان تامنی نینگ پاکستاندن توقع سی نینگ کوپ ایکنلیگی و ایککی اولکه نینگ هم تینچ لیک اوچون فعالیت آلیب باره جگی تاکییدلنگن.

اوشبو جلسه ده گپیرگن بجوا، ایککی اولکه نینگ هم ترورچیلیکدن انچه ضرر کورگنینی و بو مسئله گه قرشی بیرگه لیکده کوره ش آلیب باره جکلرینی تیلگه آلیب،

"اولاً ایککی تامان نینگ هم بیر – بیری نینگ تمامیت ارضی گه حرمت قیلگنی و بیرته سی اوز توپراغینی باشقه سیگه قرشی استفاده قیلیش گه رخصت بیرمس لیگی گه ایشانچلی فضانی یراتیشمیز کیره ک. البته شبهه منفی یانداشوولرنی کوپه یتیریب جرملی لرنینگ ایشینی آسانراق قیله دی" دیب گپیردی.

افغانستان اولکه سی پاکستاننی طالباننی اوز توپراقلریده فعالیت آلیب باریشی گه رخصت بیریب ترورچیلیکلرگه خوفسیز منطقه تامین ایتگن لیگی بیلن عیبله ماقده.  

پاکستان ایسه بولرنی قبول قیلمه ی، طالبان موجودیتی نینگ افغانستانده ایکن لیگینی پاکستان توپراقلریده انچه هجوم عملگه آشیرگن لیگینی ادعا ایتماقده.