تورکیه گه خاص بیر قیماق حقیده قیسقه معلومات

جوده فرقلی بیر سوت محصولاتی اوز اسمی نی تورکیه نینگ ایچکی انادولو منطقه سیده طبیعی و تاریخی گوزه للیک لری بیلن بیلینگن نوشهر ولایتی نینگ قیماقلی علاقه دارلیگی دن آلگن.  قیماقلی بلدیه سی نینگ طلبی گه بناً میلادی 2022- ییلده تورکیه نینگ ثبت قیلینگن جغرافی محصولاتی گه لیستی گه کیریتیلگن قیماقلی قوریق قیماغی, سریغ یاغگه اوخشه گن, پروتین و یاغ جهتی دن بای, قوریق, قتتیق و یریم آی شکلیده بیر قیماقدن عبارت.  اینک سوتی دن بوله دیگن اوشبو قیماق نینگ تیارله نیشی اوچون دستلب توپلنگن سوتلر یوقه بیر تکه دن اوتکزیله دی.  "تندیر اویی" دیب ناملنگن و کومیلگن بیر شکلده بولگن داش لرده پیشیریله دی.  سوت قینه ی باشله گچ, قزان بیلن بیرگه تندیردن چیقریله دی و یخشی لب چیقزرگن آولاو نینگ اوستی گه مس پتنوس قوییله دی.  پتنوس ایسسیق بولگچ, ایسسیق سوت ینه بیر تکه دن اوتکزیلیب باسقیچ مه باسقیچ پتنوس گه توکیله دی.  اوشبو میتود بیلن تشکیل ایتیلگن کوپیک لر, قیماق نینگ تیشیکلی بولیشی گه سبب بوله دی.  تقریباً 6 ساعت تندیرده پیشیریلگن سوتده قیماق تشکیل بولگچ, مس پتنوس نینگ چیککه لریگه یاپیشیب قالگن قیماق پیچاق بیلن قیریلیب آلینه دی.  پتنوس دن کوتریلیاتگن پیتده یریم دایره شکلی گه ایگه بولگن قیماق, تیسکری قیلیب قوییلگن غربال نینگ اوستی گه قوییله دی.  هول قیماق نینگ ترقه لیب کیتمسدن پتنوس دن کوتریلیشی و اوشبو مقصد بیلن خاص بیر شکلده تولید ایتیلگن غربال گه قوییلیشی اوچون جدی تجربه کیره ک.  هول قیماق, تیشیکلی غربال نینگ اوستیده قویاش بولمه گن و پس ایسسیق لیکده بیر اتاقده 24 ساعت کوتتیریلیب قوریتیله دی.  غربال نینگ تیشیکلی ایکن لیگی, اوستی و پسی دن هوا آلگن قیماق نینگ هر تامانی نینگ تینگ شکل و مدتده قوریشی نی تامین ایته دی.  هر ییل اوشبو علاقه دارلیکده فستیوالی هم بولیب اوتیاتگن قیماقلی قوریق قیماغی, موزلتگیچده (یخچال) 14 کون و 1 الی منفی 18 درجه ده ایسه 1 ییل گه قدر بوزیلمه یدی.