Кыргызстан II Дүйнөлүк көчмөндөр оюндарын өткөрүүгө даяр

Кыргызстанда II Дүйнөлүк көчмөндөр оюндарын өткөрүүгө даяр. Бул тууралуу бүгүн «Кабар» агенттигинде өткөн басма сөз жыйынында II Дүйнөлүк көчмөндөр оюндарына даярдык көрүү боюнча тийиштүү мамлекеттик органдардын жетекчилери жана өкүлдөрү билдирди.

2-Дүйнөлүк көчмөндөр оюндарынын (ДКО) катчылыгынын жетекчиси Нурдин Султамбаевдин айтымында, Индия менен Түркменистанды кошкондо Кыргызстанга 5 өлкөнүн өкүлдөрү келишти. Расмий ачылышы 3-сентябрда Ысык-Көл облусундагы ипподромдо жергиликтүү убакыт менен 20:30да болот. Программада 2,500 киши катышат. Анын арасында профессионал артистер, ыктыярчылар жана 100 комузчу бар.

“Бардык жабдуулар алынып келинди жана текшерүүдөн да өткөрүлдү. Кыргызстандагы эң бийик 180 метрлик экран орнотулган”, - деп айтты ал.

Ошондой эле, оюндарга даярдыктар боюнча Кыргыз Республикасынын саламаттыкты сактоо министринин орун басары Амангелди Мурзалиев дагы маалымат берди. Анын айтымында, Саламаттык сактоо министрлигинен 50 кызматкер Ысык-Көл облусуна барып, пландуу жана шашылыш медициналык кызмат көрсөтүү үчүн тартылган. «Мындан тышкары 18 тез жардам унаасы зарыл болгон дары-дармектер менен камсыздалды. Кошумча Чолпон-Атага 20 керебет Ананьевага 10 керебет дайындалды, ошондой эле аймактык ооруканалар медициналык жардам көрсөтүүгө даяр”,-деди ал.

Өз кезегинде, КРнын Мамлекеттик архитектура, курулуш жана турак жай-коммуналдык агенттигинин директору Турдубек Мамбетов 10 миң көрүүчү көрө турган ипподром көчмөндөр оюндарына конокторду кабыл алууга даяр экендигин баса белгиледи.

“Бардык курулуш-монтаждоо иштери өз убагында аяктады. Көрктөндүрүү жана жашылдандыруу иштери дагы бүтүп калды”, - деп айтты ал.