Трамп Азия өлкөлөрүнө сапарга чыгат

АКШнын президенти Дональд Трамп ноябрь айынын биринчи жумасында Азияга сапарга чыгат.

Ак үйдүн билдирүүсүндө, Трамптын 3-14-ноябрь күндөрүнүн аралыгында Япония, Түштүк Корея, Кытай, Вьетнам, Филиппиндер жана Гавайиге сапар жасай турганы билдирилди.

Президент Трамптын сапары убагында Түндүк Корея менен болуп жаткан маселени сүйлөшө турганы белгиленген билдирүүдө: «Президент, эл аралык коомчулукка Түндүк Кореяга карай кысымдын күчөтүлүүсү үчүн чакырык салат»,- деп айтылды.

Билдирүүдө Трамптын 3-ноябрда Гавайиге, 5-ноябрда болсо Японияга барып бул жерде Япониянын премьер-министри Синдзо Абэ жана Түндүк Корея тарабынан жакындары качырылган үй-бүлөлөр менен жолугуша турганы маалымдалды.

Программага караганда Трамп Япониядан кийин Түштүк Кореяга барып президент Мун Чжэ Ин жана бул өлкөдө кызмат өтөгөн АКШ аскерлери менен кезигет.

Түштүк Кореядан кийин 8-ноябрда Кытайга барып президент Си Цзиньпин менен жолугуша турган Трамп, 10-ноябрда Вьетнамга, 12-ноябрда болсо Филиппиндерге барып президент Родриго Дютерте менен жолугушат.