ملا برادر باشچیلیگیده گی طالبان گروهی هیئاتی بیر قطار اوچره شوولر اوچون پاکستان گه سفر قیلیب باردی

افغان طالبان گروهیدن بیر هیئات دوام ایته یاتگن افغانستان تینچلیک جریانی بوییچه اوچره شوو اوتکزیش اوچون 3 کونلیک سفر آرقه لی پاکستان گه باردی.

طالبان گروهی سیاسی ایشلر باشقرووچیسی اورینباسری ملا عبدالغنی برادر باشچیلیگیده گی هیئات قطرنینگ پایتختی دوحه دن پاکستان نینگ پایتختی اسلام آبادگه اوتیب باردی.

طالبان گروهی نینگ 3 کونلیک رسمی سفری دایره سیده باش وزیر عمران خان قاله ویرسه تشقی ایشلر وزیری شاه محمود قریشی کبی یوقاری مرتبه لی مقاملر بیلن اوچره شیشی کوتیلماقده.

اوچره شوولرده دوام ایته یاتگن افغانستان تینچلیک جریانی قاله ویرسه پاکستانده گی افغانستانلیک قاچقینلرنینگ اولکه لریگه قیتیب باریشلری و حدود تجارتیده افغانستانلیک سوداگرلر دوچ کیلگن قیینچیلیکلر هم تیلگه آلینه دی.

طالبان هیئتی شو بیلن سونگگی 4 آی جریانیده پاکستان گه ایککینچی مرته سفر اویوشتیرماقده.

طالبان گروهی سیاسی ایشلر باشقرووچیسی اورینباسری ملا عبدالغنی برادر باشچیلیگیده گی هیئات اگست آییده هم پاکستان گه سفر اویوشتیریب بارگندی.

طالبان بیلن افغانستان هیئاتی اورته سیده 12 سپتامبرده قطرنینگ پایتختی دوحه ده باشله گن و 2 دسامبرده کیلیشیب آلینگن مذاکره لرنینگ بیرینچی باسقیچی نینگ آرتیدن ایککینچی باسقیچی گه اوتیلگندی.

افغانستانده اوزاق ییللردن بیری دوام ایتیب تورگن اوروش گه یکون یسش مقصدی بیلن طالبان هیئاتی بیلن افغانستان هیئاتی اورته سیده ایککینچی باسقیچ اوچره شوولر 14 دسامبر کونی 23 کونگچه توخته تیب قوییلگندی.