مدافعه وزیری بسم الله محمدی نینگ اویی گه هجوم اویوشتیریلدی

افغانستان ملی مدافعه وزیری بسم الله محمدی نینگ کابل نینگ شیرپور منطقه سیده جایلشگن اویی نینگ قاشیده توناون کونی آقشم اویوشتیریلگن انفجار و قوراللی هجوم عاقبتیده 8 کیشی نینگ حیاتینی یوقاتگن لیگی 20 کیشی نینگ یره لنگن لیگی بیلدیریلدی.

ایچکی ایشلر وزیرلیگی سوزچیسی میرویس ستانکزی مطبوعاتگه بیرگن بیاناتده هجومچیلردن بیرته سی نینگ منفجره مواد اورنه تیلگن موترنی افغانستان مدافعه وزیری بسم الله محمدی نینگ اویی نینگ قاشیده پارتله تیب یوباریشی نینگ آرتیدن ایریم 4 هجومچی نینگ ایریم بیر اویگه کیریب اوق اوزگن لیگینی ایتدی.

هجومچیلرنینگ کیچه لب تاثیرسیز وضعیت گه کیلتیریلگن لیگینی افاده ایتگن ستانیکزی حادثه ده محمدی بیلن عایله سیگه ضرر ییتمه گن لیگینی قید ایتدی.

ستانکزی هجوم عاقبتیده 8 کیشی نینگ اولگن لیگینی 20 کیشی نینگ یره لنگن لیگینی منطقه ده گی اویلرده گی اونلب اهالی نینگ تخلیه قیلینگن لیگینی بیلدیردی.

شاهدلر ایسه هجوم عاقبتیده اولگنلر سانی نینگ 10 نفردن آرتیق ایکن لیگینی ادعا ایتدی.

هجوم نینگ مسؤلیتینی حلی گچه هیچ کیم بوینی گه آلگن یوق.

مسؤللر هجوم جریانیده محمدی نینگ اوییده ایریم ولایتلردن بعضی بیر یوقاری سویه لی مسؤللرنینگ هم بولگن لیگینی افاده ایتدی.

انفجار تاثیر قالدیرگن وزیرنینگ اویی نینگ اطرافیده گی ایریم اوی و ایش جایی بنالری نینگ شیشه لری سینیب کیتگن.

کایل نینگ لوکس منطقه لریدن بیرته سی بولمیش شیرپورده انچه ملت وکیل و وزیرنینگ اوی – جایی جایلشماقده.