افغانستان هوائی کوچلری طالبان رهبر لری نینگ ییغیلیش اوتکزیب تورگن جاینی اورگن

افغانستانده نظامی مسئول لر, افغانستان هوائی کوچلری نینگ اولکه نینگ شمالیده جایلشگن قندوز ولایتیده طالبان نینگ رهبرلر کینگشی ییغیلیشی جریانیده هوائی عملیات اویوشتیرگن لیگی نی بیلدیردی. 

اوشبو عملیات نتیجه سیده نیچه کیشی و کیم لرنینگ جان بیرگن لیگی توغریسیده فرقلی معلومات لر بیریلماقده. 

افغانستان اردوسی 20 نچی پامیر فرقه سی  مسئول لری اوشبو هوائی عملیات نینگ بوگون ایرته لب ساعت 11 ده اویوشتیریلگن لیگی نی معلوم قیلدی. 

خوددی منه شوو منبع, اوشبو عملیات نتیجه سیده 14 کیشی نینگ جان بیرگن لیگی نی بیلدیردی.  منبع اوشبو جان بیرگن کیشی لر آره سیده طالبان کینگشی نینگ اینگ مهم اعضالریدن بیری بولگن مولوی بریانی نینگ هم موجود ایکن لیگی نی بیلدیردی. 

عینی دمده منبع, اوشبو عملیات نتیجه سیده کمیده 10 جنگری نینگ یره لنگن لیگی نی معلوم قیلدی. 

افغانستان اردوسی 20 نچی فرقه سی نینگ سوزلاوچیسی غلام حضرت کریمی, اوشبو عملیات نینگ قندوز ولایتیده کینگ کولملی هجوملر اویوشتیریش اوچون طالبان رهبر لری نینگ ییغیلیش اوتکزیاتگن پیتده اویوشتیریلگن لیگی نی ایسله تیب اوتدی. 

بیراق, طالبان گروهی تامانیدن اوشبو خصوصده هیچ قنده ی بیر بیانات بیریلمه دی.

عینی دمده ایریم منبع لر, خوددی منه شوو هوائی عملیات نینگ دینی بیر مراسم جریانیده اویوشتیریلگن لیگی و اوشبو حادثه عاقبتیده ملکی لرنینگ هم جان بیرگن بولیشی نینگ ممکن ایکن لیگی نی بیلدیرماقده.