دوزخ نینگ ایشیکلری آچیلدی

دوزخ نینگ ایشیکلری آچیلدی

قیریم نی روس توپراقلری بیلن باغلاوچی کوپریک نینگ اورولیشی اوکراین – روسیه اوروشیده ینگی بیر باسقیچ گه اوترکن، روسیه کوتیلگنیدیک بو هجومگه قتّیق جواب بیریب آغیر راکتلر بیلن کیف قاله ویرسه انچه اوکراین شهرینی نشان آلیب اوردی. مدمدیف ایتگندیک کرچ گه اویوشتیریله دیگن بیر هجوم اوکراین اوچون دوزخ نینگ ایشیکلری آچگن بولدی. ایککی تامان هم توقنه شوولرنی اوج بیررکن، دیپلوماسی و سیاسی جهتدن توقنه شوولرنینگ توخته لیش احتمالی هم یوقه لیب بارماقده.

تشقی سیاست تیکشیرووچیسی جان اجون نینگ موضوع بوییچه فکر و ملاحظه لرینی اعتبارینگیزگه حواله ایته میز

روسیه – اوکراین اوروشی جبهه خطلریده اوزلیکسیز دوام ایتیب بارماقده، میلادی 2022 ییلی 8 اکتوبر کونی ایرته لب روسیه 2014 ییلی قوشیب آلگن قیریم نی کتته حدودگه قوشگن و کرچ بوغوزیده اورین آلگن قیریم کوپریگیده کتته بیر پارتلش یوز بیردی. کوپریک نینگ اوستیده تیل تشووچی بیر ریل یانیب کیتدی، کوپریک نینگ واسطه اوته دیگن قسملری نینگ چوکیب کیتدی. هجومگه قنداغ قیلیب قول اوریلگن لیگی بیلن تیگیشلی فرقلی سناریولر بولسه ده روسیه، منفجره مواد اورنه تیلگن بیر کامیون نینگ پارته گن لیگینی بیلدیردی. پوتین ایسه "بو روسیه فدراسیونی نینگ اساسی اهمیت گه ایگه ملکی آست قوریش نی یوق قیلیب تشلش نی مقصد قیلیب آلگن بیر تروریستیک هجوم دیر. بونگه قول اورگن و بویروق بیرگن اوکراین استخبارات سرویسی دیر" دیب بیانات بیردی.

اروپا مقیاسیده اینگ اوزون کوپریک بولمیش کرچ کوپریگی روسیه ناقانونی روشده قوشیب آلگن قیریم نینگ روسیه توپراقلریگه قوشگن انچه ستراتیژیک بیر ییر. قیمتی 3.5 میلیارد دالر بولمیش کرچ تورت قتناو یولنی و بیرته تیمیر یول نی اوز ایچی گه آلماقده. قیریمده حیات کیچیره یاتگن تینچ اهالی نینگ برچه احتیاجلری بو یولدن برطرف ایتیلر ایکن خرسونده جایلشگن روس اشغال کوچلری نینگ هم لوجستیکی بوتونله ی بوجایدن تامین ایتیلماقده. کوپریک ستراتیژیک اهمیتی قاله ویرسه سمبولیک جهتدن هم روسیه و پوتین اوچون انچه اهمیت گه سزاوار. بناً بونقه بیر بنانینگ پوتین نینگ توغیلگن کونیده بمباردمان قیلینیشی جوده مهم ایدی و دقتلر روسیه بیره دیگن جوابده ایدی.

آلدین روسیه خوفسیزلیک کینگش باشلیغی اورینباسری دیمیتری مدودیف هم دقت تارتگن کرچ و قیریم اویوشتیریله دیگن احتمالی بیر هجوم نینگ اوکراین اوچون دوزخ نینگ ایشیگینی آچه جگی هردایم اورغولنماقده ایدی. کوتیلگن شکلده هم بولدی. روس اردوسی بیرنیچه کون کیین کیف قاله ویرسه انچه اوکراین شهرینی آغیر راکت آرقه لی نشان آلیب اوردی. توپلم یوزدن آرتیق آغیر راکتدن ایش آلینگن هجوملر عاقبتیده انچه مهم آست قوریش تاسیساتی اینیقسه حرارتلی سنتراللر آماج قرار بیریلدی. تینچ اهالی هم نشان آلیب اوریلگن بو هجوملرنینگ اوروش نینگ دوامی جهتیدن توغریدن توغری بیر تاثیری بولمسه ده روسیه نینگ کرچ گه قره ته هیچ بولمه گنده تاثیرلی بیر شکلده جواب بیریشی کوریلدی.

ایککی کون دوام ایتگن راکت هجوملری نینگ مالی کلفتی روسیه گه کمیده بیر میلیارد دالر بولگن لیگی حسابلنماقده. البته کی اوکراین آست قوریشی کوپراق ضرر کوردی. اصل مهم سوال روسیه جهتیدن آغیر راکت هجومی قنچه دوام ایتیشی ممکن؟ آلیب باریلگن بهالندیروولرده روس اردوسی نینگ ذخیره سی ستراتیژیک اهمیت گه ایگه آغیر راکتلرنینگ اداغگه ییتیب باراتگن لیگی و روس مدافعه صنایعی نینگ تشقریگه هم باغلیق بولگن راکت توزوملری نینگ ییترلی تیزلیکده تولید ایتیلمه گن لیگی توغریسیده دیر. اوروش جریانی دوامیده روسلرنینگ بو قوراللرنی جوده آز ایش آلگن لیگی کوریله دی. جبهه خطلریگه اونچه لیک تاثیر قالدیرمه گن بو هجوملر روس اردوسی نینگ روحیه سینی کوترگن بولیشی ممکن. سونگگی کونلرده اوکراین اردوسی نینگ خرسونده گی ایلگری باریشی توخته لگن وضعیتده. قسمی سفربرلیک قراری نینگ آرتیدن اوکراین گه سوق ایتیلگن ینگی روس کوچلری نینگ توازن برقرار قیلیشی معما. شونده ی بولیب غرب اولکه لری تامانیدن اوکراین گه تاباره کوپه ییب بارگن حربی کمکلری گه نظر تشله گنده ایککی تامان نینگ هم توقنه شوونی کوپه یتیرگنی بیر حقیقت. کرچ هجومی و آرتیدن یوز بیرگنلر، بو اوروش نینگ آسانلیک بیلن بیتمسلیگینی کورستماقده.     

تشقی سیاست تیکشیرووچیسی جان اجون نینگ موضوع بوییچه فکر و ملاحظه لرینی اعتبارینگیزگه حواله ایتدیک