چاۋۇشئوغلۇ بايراموۋ بىلەن تېلېفونلاشتى
دۆلىتىمىز (تۈركىيە جۇمھۇرىيىتى) تاشقى ئىشلار مىنىستىرى مەۋلۈت چاۋۇشئوغلۇ ئەزەربەيجان تاشقى ئىشلار مىنىستىرى جەيھۇن بايراموۋ بىلەن تېلېفوندا كۆرۈشتى.
تۈركىيە ئاۋازى رادىيوسى خەۋىرى: چاۋۇشئوغلۇ، ئاممىۋى ئورتاقلىشىش تور بېتى Twitter سەھىپىسىدە ئېلان قىلغان باياناتىدا، ئەزەربەيجان تاشقى ئىشلار مىنىستىرى جەيھۇن بايراموۋ بىلەن ئېلىپ بارغان تېلېفون سۆھبىتىدە، ئەزەربەيجان – ئەرمېنىيە چېگراسىدىكى «ئەرمەنلەرنىڭ ئىغۋاگەرچىلىكلىرى» ھەققىدە مۇزاكىرە ئېلىپ بارغانلىقلىرىنى تەكىتلەپ مۇنداق دېدى: «ئەرمېنىيە ئەمدى قۇتراتقۇلۇق قىلىشنى توختىتىشى كېرەك. ئەزەربەيجان بىلەن يارىشىش رامكىسى ئىچىدە تىنچلىق سۆھبىتى ۋە ھەمكارلىققا ئەھمىيەت بېرىشى لازىم.»
ئەزەربەيجان – ئەرمېنىيە چېگراسىدا، ئىككى دۆلەت قىسىملىرى ئوتتۇرىسىدا قويۇق توقۇنۇشلار باشلانغانىدى.
ئەزەربەيجان دۆلەت مۇداپىئە مىنىستىرلىقى، ئەرمېنىيە ئارمىيەسىنىڭ تۈنۈگۈن كەچ تەرەپلەردە چېگرا لىنىيەسىنىڭ داشكەسەن، كەلبەجەر ۋە لاچىن يۆنىلىشلىرىدە كەڭ دائىرىلىك ئىغۋاگەرچىلىك قىلغانلىقىنى ئۇقتۇرغانىدى.
