блинкен: биз һазирқи әһвалда рәфаһқа һуҗум қилишқа қарши

түркийә авази радийоси хәвири: америка ташқи ишлар министири антони блинкен әнглийә ташқи ишлар вәзири давид камерон билән вашингтонда көрүшкәндин кейин өткүзүлгән ахбарат елан қилиш йиғинида, ғәззә вәзийити үстидә тохталди.

у исираилийәниң пуқраларниң қоғдашқа мунасивәтлик қобул қилғили болидиған бир пилани болмай туруп, рәфаһни ишғал қилишиға қарши икәнликлирини, бу мәсилә үстидә исираилийәниң мунасивәтлик рәһбәрлири билән алақә қиливатқанлиқлирини билдүрди.

у исираилийә баш министири нетанйаһуниң, «рәфаһқа қуруқлуқтин һуҗум қилиш вақтиниң бекитилгәнлики» тоғрисидики байанати һәққидә соралған соалға:

«қолимизда рәфаһ һәрикитигә мунасивәтлик бекитилгән вақит йоқ, йәни исираилийәниң бизгә билдүргән вақти йоқ» дәп җаваб бәрди.

у һәр қетим исираилийә даирилири билән көрүшкәндә, пуқраларни қоғдаш мәсулийитиниң барлиқини тәкитләватқанлиқлирини, исираилийәниң вәкилләр өмики билән учришиш өткүзүлмәй туруп, рәфаһ шәһиригә һуҗум қилишниң башлинишини күтмәйдиғанлиқлирини қәйт қилди.

у исираилийә вәкилләр өмикиниң келәр һәптә вашингтонға келиши мумкинликини әскәртти.

у исираилийәниң ғәззәгә инсанпәрвәрлик йардәмлирини тошуйдиған йүк аптомобиллири санини көпәйтишкә рухсәт қилғанлиқидин мәмнунлуқ һес қилғанлиқлирини вә йардәмләрни көпәйтишкә тиришиватқанлиқлирини билдүрди.

у йәнә, исираилийә билән һамас оттурисида балдуррақ уруш тохтитиш мәсилисидә келишим һасил қилинишини, әсирләрниң қойуп берилишини вә инсанпәрвәрлик йардәмлириниң көпәйтилишини халайдиғанлиқлирини тәкитләп, һазирниң өзидә буларниң алдин әһмийәт беридиған мәсилиләр икәнликини қәйт қилди.