хитай төт дөләт маневир өткүзүватқан җәубий деңизни чарлайдиғанлиқини елан қилди
хитай армийәси америка, филиппин, йапонийә вә австиралийә қатарлиқ дөләтләр бирләшмә һәрбий маневир елип бериватқан җәнубий деңизда чарлаш елип баридиғанлиқини елан қилди.
түркийә авази радийоси хәвири: хитай хәлқ азадлиқ армийәсиниң җәнубий фиронт қоманданлиқ иштаби байанат елан қилип, қоманданлиқ тәркибидики һава вә деңиз қисимлириниң җәнубий деңизда «бирләшмә җәң чарлаш паалийәтлири» ни елип баридиғанлиқини билдүргән.
байанатта, америка вә башқа дөләтләрниң исми тилға елинмастин, «районниң вәзийитигә бузғунчилиқ қилиш вә киризис нуқтилирини пәйда қилишни мәқсәт қилған һәрбий паалийәтләрниң көзитиш астида» икәнлики билдүрүлди.
төт дөләтниң дөләт мудапиә министирлири түнүгүн (7-апрел) елан қилған бирләшмә байанатида , җәнубий деңизда «қанунниң үстүнлүки, деңиз вә һава сәпәрлири қилиш һәқ-һоқуқини қоғдаш» үчүн бирләшмә маневир өткүзүлидиғанлиқини елан қилған иди.
мәзкур бирләшмә маневирниң «ғәрбий филиппин деңизи» дәп атилидиған җәнубий деңизниң шималида, йәни хитай билән филиппин оттурисида игилик һоқуқ маҗирасиға сәвәб болуватқан вә йеқинқи күнләрдә икки дөләт деңиз қирғиқи муһапизәт парахотлириниң бир-биригә соқулуш дәриҗисигичә йетип барған җиддийчиликләр йүз бәргән районда елип берилидиғанлиқи уқтурулған.
җәнубий деңиз иккинчи дунйа урушидин кейин деңиз бойидики дөләтләр мустәқиллиқини қолға кәлтүргәндин буйан, райондики дөләтләр арисида игилик һоқуқи маҗиралириниң мәркизий болуп кәлди.
