ғәззә ички ишлар министирлиқи ғәззә райониниң әң йеңи әһвали һәққидә байанат елан қилди
ғәззә һөкүмитиниң ички ишлар министирлиқи исраилийәниң көчүшкә зорлиши вә вәһшийләрчә бесим астиға елишиға песәнт қилмастин, һазирму шималий ғәззә районлирида тәхминән 900 миң кишиниң йашаватқанлиқини елан қилди.
түркийә авази радийоси хәвири: ғәззә һөкүмити ички ишлар министирлиқи байанатчиси ийад әл бәзм мухбирларни күтүвелиш йиғинида, бир айдин буйанқи исраилийәниң шиддәтлик һуҗумлириға дучар болуватқан муһасирә астидики ғәззә райониниң әң йеңи әһвали һәққидә мәлумат бәрди.
байанатчи ийад әл бәзм исраилийәниң һуҗуми сәвәбидин ғәззәдики инсанпәрвәрлик вәзийитиниң күнсери еғирлишиватқанлиқи тәрәпкә һәмминиң диққитини тартип: «ғәззә вә шималий ғәззә районида ичидиған су йоқ, бу вәҗидин кишиләр мәйнәт су ичишкә мәҗбур болмақта» деди.
ийад әл бәзм бу районларда исраилийә навайханиларни системилиқ һуҗум нишани қилған болғачқа, навайханиларниңму хизмәттин тохтиғанлиқини билдүрди.
ғәззә вә шималий ғәззәдики панаһланғучилар мәркәзлиридә туруватқан кишиләрниңму исраилийәниң һуҗум нишани болуватқанлиқини әскәртип, тәхминән 900 миң кишиниң бу йәрдә йашаватқанлиқини ейтти.
һамасниң қораллиқ қанити изддин қассам биригадалири 7-өктәбир (2023) әтигәндә «исраилийәниң пәләстинликләргә вә уларниң муқәддәс җайлири вә қиммәт қарашлириға, болупму мәсҗиди әқсаға қилған һуҗумлири вә қанунсизлиқлириға җавабән» кәң көләмлик һуҗум қозғиған иди. исраилийә қисимлириму ғәззә райониға һавадин һуҗум қилип, вәһшийләрчә бомбардиман қилишни башлиған иди.
күнсери кәскинлишиватқан туқунушларда, һәр икки тәрәптин миңлиған киши қаза қилди.
