рәфаһтин көчүшкә мәҗбур болуп қалған пәләстинликләр сани 810 миңға йәтти

түркийә авази радийоси хәвири: бирләшкән дөләтләр тәшкилатиниң йеқин шәрқтики пәләстин мусапирлириға йардәм бериш вә хизмәт қилиш оргини (UNRWA) иҗтимаий таратқу суписи «X» тики адресида байанат елан қилип, исраилийә һуҗум қилишни давамлаштуруватқан ғәззәниң рәфаһ шәһиридин көчүшкә мәҗбур болуп қалған пәләстинликләр тоғрисида мәлумат бәрди.

ғәззәдә һечқандақ йәрниң бихәтәр әмәслики тәкитләнгән байанатта: «аилиләр һәр қетим өй-маканлиридин айрилғанда, һайатлири еғир хәтәрләргә дуч кәлмәктә. кишиләр бихәтәр җай издәш үчүн, һәммә нәрсини ташлап кетишкә мәҗбур болмақта» дегән ибариләргә орун берилди.

исраилийәниң һуҗумлири астидики рәфаһтин йеқинқи икки һәптиниң мабәйнидә 810 миңдин артуқ пәләстинликниң көчүшкә мәҗбур болғанлиқиға ишарәт қилинған байанатта, уруш тохтитиш тәләп қилинди.

исраилийә армийәси 6-май байанат елан қилип, өй-маканлиридин айрилип қалған пәләстинликләр панаһлиниватқан рәфаһниң шәрқидики бир қисим мәһәллиләрниң бошитилишини тәләп қилғаниди.

исраилийә армийәси 7-май рәфаһқа қуруқлуқтин һуҗум қилип, ғәззәниң мисир билән болған чегра еғизиниң ғәззә тәрипини қолға киргүзгәнликини елан қилғаниди.

исраилийә бихәтәрлик кабинетиниң 10-май рәфаһқа қаритилған қуруқлуқ һуҗуминиң «даирисини кеңәйтиш» қарарини тәстиқлиғанлиқи илгири сүрүлгәниди.