америка ашлиқ келишими үчүн түркийәгә рәһмәт ейтти
америка ташқи ишлар министирлиқи түркийәниң қарадеңиз ашлиқ каридори келишимигә мунасивәтлик көрсәткән дипломатик тиришчанлиқлири үчүн рәһмәт ейтти.
түркийә авази радийоси хәвири: америка ташқи ишлар министирлиқи байанатчиси түркийә ташқи ишлар министири хақан фиданниң түнүгүн (31-авғуст) москвада русийә ташқи ишлар министири сергей лавров билән көрүшүп, ашлиқ келишимини йеңилашниң әһмийити үстидә тохталғанлиқи тоғрисида йазма байанат елан қилди.
у: «түркийә билән башқа дөләтләрниң русийәни келишимгә қайтуруп келиш тиришчанлиқлирини қизғин қарши алимиз. қарадеңиз ашлиқ каридори келишимигә мунасивәтлик көрситилгән дипломатик вә әмәлий тиришчанлиқлири үчүн, натодики иттипақдишимиз түркийәгә тәшәккүр ейтимиз. » деди.
түркийә ташқи ишлар министири хақан фидан москвада русийә ташқи ишлар министири лавров билән бирликтә өткүзүлгән ахбарат елан қилиш йиғинида, қарадеңиз ашлиқ келишими үстидә тохтилип: «дөлитимизниң тиришчанлиқлири нәтиҗисидә, б д т йеңи тәклип лайиһәси тәййарлиди. биз бу тәклип лайиһәсини қарадеңиз ашлиқ келишимини қайта йолға қойушниң мувапиқ асаси дәп қараймиз, тиришчанлиқлиримизни давамлаштуримиз. бу келишим һәм дунйа йемәк-ичмәк бихәтәрлики һәмдә қарадеңизниң муқимлиқи вә тинчлиқи үчүн пәвқуладдә муһим әһмийәткә игә» дегән иди.