дуда: русийәниң вагнерниң паалийәтлирини контрол қилидиғанлиқидин қилчиликму гуманланмаймән
полша пирезиденти андрезҗе дуда русийә бихәтәрлик ширкити вагнерни бир «хусусий йалланма әскәрләр гурупписи» дәп қаримайдиғанлиқини оттуриға қойди.
түркийә авази радийоси хәвири: полша пирезиденти андреҗе дуда русийә бихәтәрлик ширкити вагнерни бир «хусусий йалланма әскәрләр гурупписи» дәп қаримайдиғанлиқини әскәртип: «әмәлийәттә, мән вагнер елип барған паалийәтләрниң русийә даирилири тәрипидин контрол қилинидиғанлиқидин қилчиликму гуманланмаймән» деди.
полшаниң шималиға җайлашқан порт шәһири гдинйадики деңиз армийәси мәшғулат мәркизини зийарәт қилған дуда, райондики әң йеңи өзгиришләр тоғрисида тохталди؛ у өзиниң русийәниң балтиқ деңизида елип барған маневиридин хәвәрдар икәнликини вә бу маневирниң 30 айропилан, 30 парахот вә 6000 русийә әскириниң иштирак қилиши арқисида елип берилғанлиқини билдүрди.
балтиқ деңизи вәзийитиниң үзлүксиз көзитиливатқанлиқини тәкитлигән дуда: «биз буни украинада давамлишиватқан уруш (2022- йили 2- айниң 24-күнидин буйан), русийәниң украинадики таҗавузчилиқи вә москваниң шәрқий чеграсидики паалийәтлири билән ениқла мунасивәтләштүримиз» деди.
у өзлириниң вагнерниң беларусийәдики мәвҗутлуқидинму хәвәрдар икәнликини, әмма вагнерни «хусусий йалланма әскәрләр гуруһи» дәп қаримайдиғанлиқини тилға елип: «биз уларни толуқ мәнидики бир хусусий қошун дәп қаримаймиз. әмәлийәттә, мән вагнер елип барған паалийәтләрниң русийә даирилири тәрипидин контрол қилинидиғанлиқидин қилчиликму гуманланмаймән» дегәнләрни қәйт қилди.
