шиветсийә билән данийә ислам һәмкарлиқ тәшкилатиниң қарарлири тоғрисида байанат елан қилди

түркийә авази радийоси хәвири: шиветсийә ташқи ишлар министири тобийас билстром шиветсийә дөләтлик телевизийә қанили SVT ға байанат берип: «қарар бир қатар тәклип вә тәвсийәләрни өз ичигә алиду. биз буларни әстайидиллиқ билән тәкшүрүп, ислам һәмкарлиқ тәшкилатиға әза дөләтләр билән болған муһим дийалогимизни давамлаштуримиз. һөкүмәт шиветсийәдики намайишларда шәхсләр садир қилған ислам дүшмәнлики һәрикәтлиридин йирақ туриду. әдлийә министирлиқи тәртип – интизам қанунини қайта тәһлил қилиш хизмәтлирини давамлаштуруватиду» деди.

данийә ташқи ишлар министири ларс локке расмуссенму твиттердики адресида байанат елан қилип, дөлитиниң ислам һәмкарлиқ тәшкилати йиғининиң қарарлирини нәзәргә алидиғанлиқини тәкитләп: «биз ислам һәмкарлиқ тәшкилати вә униңға әза дөләтләр билән өзара һөрмәт қилиш асасидики қойуқ сөһбәтни давамлаштуримиз. данийә йеқинқи мәзгилләрдики қуран кәримниң көйдүрүлүши қилмишлирини әйиблиди вә пикир әркинлики даирисидики алаһидә әһвалларға арилишиш мумкинчилики үстидә издиниватиду» дегәнләрни қәйт қилди.

ислам һәмкарлиқ тәшкилати бу һәқтә чақирилған түнүгүн (31-ийул) ки пәвқуладдә йиғинидин кейин байанат елан қилип, шиветсийә билән данийәдики қуран кәримниң муқәддәсликигә қайта- қайта қилинған һуҗумларниң қаттиқ әйибләнгәнликини оттуриға қойғаниди.

байанатта, ислам һәмкарлиқ тәшкилатиниң йавропа иттипақи комитетиға вәкилләр өмики әвәтип, пикир әркинлики намида елип бериливатқан бу хил қилмишларниң тәкрарлинишиниң алдини елишни қарар қилғанлиқи һәмдә әза дөләтләрни қуран кәрим көйдүрүлгән дөләтләр билән болған мунасивитини қайта көздин кәчүрүп, тегишлик позитсийә билдүрүшкә чақиридиғанлиқи қәйт қилинғаниди.

бу арқа көрүнүштә, әза дөләтләрдин шиветсийә вә данийәдики баш әлчилирини мәслиһәтлишиш мәқситидә қайтуруп келишни өз ичигә алған сийасий қәдәмләрни ташлиши тәләп қилинғаниди.

ислам һәмкарлиқ тәшкилатиниң мәзкур темиға мунасивәтлик тор йиғини давамлишиватқан пәйттә, данийә билән шиветсийәдә қуран кәримгә һуҗум қилиш қилмишлири садир қилинғаниди.