америка истихбарат органлириниң вухән вирусиниң мәнбәсини тәкшүрүши хитайни биарам қилди
хитай америка федератсийә тәкшүрүш идариси башлиқи кристофир врайниң, «ковид -19 вируси еһтийатсизлиқтин хитайниң тәҗрибиханисидин чиқип кәткән» дегән қараш үстидә тәкшүрүш елип бериватқанлиқини җакарлиғанлиқиға наразилиқ билдүрди.
түркийә авази радийоси хәвири: хитай ташқи ишлар министирлиқи байанатчиси мав ниң бейҗиңда өткүзүлгән қәрәллик мухбирларни күтүвелиш йиғинида, вирусниң мәнбәсиниң тәкшүрүлишини сийасий монопуллуққа айландурушқа хитайниң қарши туридиғанлиқини билдүрди.
байанатчи мав ковид -19 йуқуми башланғанда, вирус тунҗи қетим көрүлгән вухән шәһиридә дунйа сәһийә тәшкилати мутәхәссисләр һәйитиниң тәкшүрүш елип барғанлиқини әскәртип, һәйәт тәййарлиған доклатта «вирусниң тәҗрибиханидин чиқиш еһтимали интайин төвән» дегән хуласигә келингәнликини тәкитлиди.
мав вирусниң мәнбәси тоғрисидики тәкшүрүшләрниң мутәхәссисләр тәрипидин елип берилиши керәкликини билдүрүп, «илмий бир мәсилини тәкшүрүш вәзиписини истихбарат органлириға тапшуруш, мәсилиниң сийасийлаштурулғанлиқини ениқ көрситип бериду. америка истихбарат органлириниң илгири йасап чиққан һекайилирини нәзәрдә тутқанда, улар чиқарған йәкүнниң ишәнчлик болиши йоқ дейәрлик» деди.
мав американи илим-пән вә пакитларға һөрмәт қилишқа шундақла истихбарат органлириниң тәшәббуси астидики мәнбә тәкшүрүш хизмәтлиригә хатимә беришкә чақириқ қилип, «америка <тәҗрибиханидин чиқип кәткән> дегән нәзәрийиләрни тәкрарлаш арқилиқ хитайни қарилашта утуққа еришәлмәйду. бәлки өзиниң инавитигә зийан йәткүзиду». деди.
