бу йилқи һәҗ шоари «дунйа ханлиқниң қәлбидә»болди
сәуди әрәбистан медийа ишлири министирлиқи бу йилқи һәҗ шоариниң «дунйа ханлиқниң қәлбидә» болидиғанлиқини билдүрди.
түркийә авази радийоси хәвири: сәуди әрәбистан медийа ишлири министирлиқи бу йилқи һәҗ шоарини «дунйа ханлиқниң қәлбидә»дәп бекитти.
министирлиқниң рәсмий байанатчиси абдуллаһ бин әһмәд әл мәғлус, министирлиқниң рәсмий тор бетидә шоар үчүн лайиһләнгән бәлгиниң һәҗ мәзгилдә орундилидиған ибадәтләр вә тарихий йадикарлиқларға вәкиллик қилидиған 8 амилдин тәшкил тапқанлиқини билдүрди.
йеңи лайиһәниң медийа ишлири министирлиқиниң һәҗ ишлирини пиланлаш хизмәтлири даирисидә елип барған түрлиридин бири икәнликини ейтқан мәғлус, сәуди әрәбистанлиқ йашлардин тәшкил тапқан бир хизмәт әтрити тәрипидин тәййарланған бәлгидә һәҗкә мунасивәтлик амилларниң әкс әттүрүлгәнликини әскәртти.
йеңи бәлгидики 8 амил кәбә, тавап, һәҗ, қиблә, мәккә саәт мунари, мәккиниң мәркизи орни, симсиз интернет вә палмийә йопурмақлиридин тәшкил тапиду.
бәлгидә кәбә квадрат шәклидә көрситилгән болуп, кәбәниң әтрапидики сизиқлар болса «тавап»қа вәкиллик қилиду.
бәлгидә «һәҗ»кәлимисини тәшкил қилидиған әрәбчә « ح » вә «җ» һәрплириму даирилик сизиқлар билән ипадиләнгән болса, әрәбчә «җ»һәрпиниң чикитини кәбә тәшкил қилиду.
компас шәклидә көрситилгән «қиблә»ниң мәркизигә кәбә орунлаштурулди. бәлгидә мәккидики саәт мунари вә мәккиниң мәркизи орнини көрситидиған дунйа хәритиси бар.
симсиз интернет дунйадики һәр қайси мусулманларниң мәккәдә күтүвелинишиға, палма йопурмақлири болса сәуди әрәбистанниң мәдәнийәт вә җуғрапийәлик алаһидиликигә вәкиллик қилиду.
сәуди әрәбистанниң бу йил 3 милйон 500миң һаҗини күтүвелиши мөлчәрләнмәктә.
