америка иранниң башқурулидиған бомба синақ қилғанлиқини илгири сүрди

түркийә авази радийоси хәвири: америка қошма иштатлири иранниң оттура мусапилик баллистик башқурулидиған бомба синақ қилғанлиқини илгири сүрди.

бир америкилиқ әмәлдар башқурулидиған бомба синиқиниң теһранға тәхминән 200 километир мусапидики сәмнан шәһиригә йеқин җайда елип берилғанлиқини билдүрди.

башқурулидиған бомбиниң нишанға йетип баралмай тәхминән 1000 километирдин кейин чатақ чиққанлиқи қәйт қилинди.

вашингитондин бу һәқтә елан қилинған байанатта, буниңға охшаш бир башқурулидиған бомбиниң 2016-йили ийундиму синақ қилинғанлиқи әскәртилди.

иранниң башқурулидиған бомба синақ қилишидин хәвири барлиқини ейтқан ақсарай байанатчиси шан сипайсир бу һәқтә ениқ мәлумат бәрмиди.

бирләшкән дөләтләр тәшкилати омумий кеңишиму иранниң башқурулидиған бомба синақ қилишидин кейин җиддий йиғин чақиришни қарар қилди.

б д т хәвпсизлик кеңишиниң 2015-йилдики қарарида, иранниң 8 йил йадро қораллири тошуш иқтидари болған баллистик башқурулидиған бомба йасап чиқалмайдиғанлиқи билдүрүлгәниди.  

мәзкур қарарға асасланғанда, иран йәнә 5 йил ичидә еғир типлиқ қораллар импорт қилалмайду, лекин бу мәзгилдә дөләтләр б д т хәвпсизлик кеңишиниң рухситини алған әһвалда иранға баллистик башқурулидиған бомба технологийәси вә қорал-йарағ експорт қилалайду.  б д т хәвпсизлик кеңишиниң рухсәт бериши үчүн америка, хитай, әнглийә, русийә вә фирансийә бирдәк қоллиши шәрт, лекин америка иранға баллистик башқурулидиған бомба технологийәси вә қорал-йарағ експорт қилинишиға йол қоймайдиғанлиқини билдүргәниди.