جاپان میں قبل ازوقت انتخابات،شینزو آبےکی کامیابی یقینی

جاپان میں قبل از وقت انتخابات کے لیے اتوار کو ہونے والی پولنگ کا عمل مکمل ہوگیا ہے اورابتدائی نتائج کے  تحت وزیرِاعظم شنزو آبے کی جماعت دوبارہ بھاری اکثریت سے کامیابی حاصل کرنے کے قریب ہے۔

خبر کے مطابق وزیرِاعظم کی جماعت لبرل ڈیموکریٹک پارٹی اور اس کی اتحادی جماعتوں کی پارلیمان کے 465 رکنی ایوانِ زیریں میں 311 نشستوں پر کامیابی یقینی ہے جس کے نتیجے میں حکمران اتحاد کی ایوان میں دو تہائی اکثریت برقرار رہے گی۔

شنزو آبے پہلی بار دسمبر 2012 میں اقتدار میں آئے تھے اور اگر ان کی جماعت  گزشتہ روز  ہونے والی انتخابات میں بھاری اکثریت سے کامیاب ہوگئی تو ان کے لیے آئندہ سال ستمبر میں ایک بار پھر تین سال کے لیے اپنی پارٹی کا سربراہ منتخب ہونے کی راہ ہموار ہوجائے گی۔

شنزو آبے نے گزشتہ ماہ پارلیمان کے ایوانِ زیریں کو تحلیل کرکے قبل از وقت انتخابات کرانے کا اعلان کیا تھا جس کا مقصد ملک کے سماجی تحفظ کے نظام میں اصلاحات اور جاپان کے آئین میں مجوزہ ترامیم کے لیے عوام سے  اعتماد  حاصل کرنا تھا۔

شنزو آبے شمالی کوریا کی جانب سے دی جانے والی مسلسل دھمکیوں کے باعث جاپان کی دفاعی صلاحیتوں میں مزید اضافے اور افواج کو مزید موثر بنانے کے حامی ہیں جس کے لیے انہیں آئین میں ترمیم کرنا ہوگی۔

دوسری جنگِ عظیم کے بعد امریکی ایما پر بننے والے جاپان کے آئین کی شق 9 کے تحت جاپان مسلح افواج نہیں رکھ سکتا۔