شیخ حسینہ نے نریندر مودی کو سقوط ڈھاکہ کی تصویر پیش کی

بھارت کے وزیر اعظم نریندر مودی نے اپنے دورہ بنگلہ دیش کے دوران اپنے بیان میں سقوط ڈھاکہ میں بھارت کے عمل دخل کا اعتراف کیا ہے۔
نریندر مودی کے اس بیان کے بعد پاکستان کی طرف سے ردعمل کا اظہار اور بین الاقوامی برادری سے اس کا نوٹس لینے کا مطالبہ کیا گیا ہے۔
آج بنگلہ دیش کی وزیر اعظم شیخ حسینہ نے مودی کو 1971 کی جنگ میں پاکستانی فوج کے ہتھیار پھینکنے کی تصویر پیش کر کے پاکستان کے اس زخم پر مزید نمک چھڑک دیا ہے۔
واضح رہے کہ 1971 کی جنگ میں جنرل نیازی نے اپنے 93000 جوانوں کے ساتھ بھارتی مسلح افواج اور مکتی باہنی کی گوریلا فورس کے سامنے ہتھیار پھینکے۔ اس موقع پر جنرل نیازی نے اپنے بیان میں کہا کہ انہوں نے ہتھیار مغربی پاکستان کی ملٹری ہائی کمانڈ کے جرنیل یحیٰ خان کے حکم پر پھینکے۔
مودی نے اپنے دورہ بنگلہ دیش کے دوران بنگا بندو میموریل عجائب گھر کا بھی دورہ کیا اور شیخ مجیب الرحمن کو خراج عقیدت پیش کیا۔