Түркия Хорватиядагы жер титирөөдөн жапа чеккендерге жардам көрсөтүүдө

Хорватияда болгон 6,2 баллдык жер титирөөдөн кийин жапа чеккендерге Түркиядан жардам жеткирилди.

Апаат жана чукул кырдаалды башкаруу башкармалыгынын (AFAD) билдирүүсүндө, 2020-жылдын 29-декабрында Хорватияда болгон жер титирөөнүн себебинен 7 киши каза болуп, 28 кишинин жаракат алгандыгы эске салынды.

Билдирүүдө жер титирөөдөн жабыркагандарды кыш мезгилинде жылыта турган 272 жылыткыч жана 16,5 чарчы метрдик 480 даана үй-бүлөлүк чатырдын Хорватияга жеткирилгендиги маалымдалды.

Билдирүүдө: «AFADдын 30 контейнер үйү 3-январда (Түркия убактысы боюнча) саат 06:00дө Ро-Ро кемесине жүктөлүп жолго чыккан. Калган 70 контейнер үйдүн да 5-январь күнү кечинде кайрадан деңиз аркылуу жөнөтүү пландалууда», делди.