ترکیه جمهور رئیسی رجب طیب ایردوغان تکرار عدالت و ترقیات حزبی گه رهبر ایتیب سیلندی
جمهور رئیس بیلن باش وزیر صحبت گه چیقدیلر
تناون کون انقره ده آق حزب نینگ 3- فوق العاده بویوک کنگره سی بولیب اوتدی.
کنگره ده 1370 هیئت نینگ امضاسی بیلن یکّه نامزاد بولگن جمهور رئیس ایردوغان ینه بیر بار آق حزب نینگ رهبری بولدی.
کنگره ده حزب نینگ قانون- قاعده لریگه اوزگرتیریش کیریتیلدی و حزب نینگ باش رهبریگه اورین باسر تعیینلش قبول قیلیندی.
بونگه کوره، باش وزیر بن علی ییلدیریم آق حزب نینگ رهبر اورین باسری ایتیب تعیینلندی.
کنگره ده اوّلا ترکیه جمهور رئیسی و آق حزب نینگ ینگی رهبری رجب طیب ایردوغان سوزگه چیقدی.
او سوزله گن نطقیده، اوّلا مملکتده یوز بیرگن سیاسي اوزگریشلرگه توخته لدی.
شونینگدیک، مملکت تینچلیگی گه رخنه سالگن ترور تشکیلاتلری، جمله دن فتح لله گُولن حرکتی، پی کاکا ترور تشکیلاتی و داعش گه قرشی کوره ش ترکیه نینگ استقبالی جهتیدن مهم ایکنینی ایتدی.
ترکیه ده دوام ایته یاتگن فوق العاده وضعیت ریژیمی حقیده فکر بیلدیرگن ایردوغان: «ترکیه ده دولتنی تونتریش گه حرکت قیلیندی. بونگه مانع بولیش و برطرف ایتیش مقصدیده فوق العاده وضعیت جاري ایتیلدی. فرانسه 1 یریم ییل فوق العاده وضعیت اعلان قیلدی. غرب دولتلری قَیسی یوز بیلن ترکیه دن فوق العاده وضعیتنی بیکار قیلیشینی طلب قیلیه یابدی. مملکتیمیزده تینچلیک، برقرارلیک تأمینلنگونیچه فوق العاده وضعیت بیکار قیلینمه یدی»،-دیدی.
کنگره ده باش وزیر بن علی ییلدیریم هم صحبت قیلدی.
او اوز صحبتیده آق حزبگه ایردوغان نینگ خدمتلری بی قیاس ایکنینی ایتیب اوتدی.
اونینگ ایتیشیچه، ایردوغان آق حزبگه رهبر بولمه گن دورده هم حزبنی معنوي جهتدن قوللب قوّتلب کیلدی.
ترکیه جوده کتّه فلآکتلرنی باشیدن اوتکزگنینی ایتگن بن علی ییلدیریم، حکومتنی باشقرگن آق حزب بونده ی مرکّب دورده تجربه سینی ینه ده آشیرگنینی تیلگه آلدی.
«تروریزمگه قرشی کوره ش دوام ایته دی. تروریزمنی دولت کون ترتیبیدن چیقره میز»،-دیب ایتدی بن علی ییلدیریم اوز معروضه سیده.
او امریکا حکومتی نینگ ترور گروه لریگه نسبتاً مناسبتینی تنقید قیلر ایکن، داعش ترور تشکیلاتینی باشقه ترور تشکیلاتلری واسطه سیده یوق قیلیب بولمسلیگینی تیلگه آلدی.
