S 400 می؟ یاکه امریکا قوشمه ایالتلری نینگ باشقه جهتگه یونهلیشی می؟
تحلیل و تیکشیروو
تحلیل تیکشیروو 25
S 400 می؟ یاکه امریکا قوشمه ایالتلری نینگ باشقه جهتگه یونهلیشی می؟
اوّلگی دستوریمیزده یلتا کنفراسسیدن کیین یوزهگه کیلگن ساووق اوروش ترتیبی چوکیب باشلهگنی، بیراق هنوز ینگی ترتیب توزیلمهگنلیگی حقیده بحث یوریتگن ایدیک. شو بیلن بیرگه، ینگی گلوبال ترتیب ایزلنوویگه امریکا قوشمه ایالتلری، روسیه و چین نقطهی نظریدن اعتبار قرهتگن ایدیک.
انقره ییلدیریم بایزیدعالی بیلیم یورتی سیاست علملر فاکولته سی باشلیغی پروفیسور قدرت بلبل نینگ موضوع بیلن تیگیشلی یازووینی تقدیم ایته میز.
بو عمومی تیکشیروونینگ آرتیدن ایندی تورکیه و تورکیه نینگ خوفسیزلیک احتیاجی موضوعسی گه اوته میز.
تورکيه نینگ خوفسیزلیکنی تأمینلشگه بولگن احتیاجی…
1-جهان اوروشیده اوز توپراقلری نینگ کتّه قِسمیدن قولدن بیرگن عثمانلی دولتی و آرتیدن تشکیل تاپگن تورکيه جمهوریتی، ینه هم چیکلنگن جغرافیهده بولسه هم اوز حکمرانلیگینی دوام ایتتیرگن ایدی. سوویت اتفاقی نینگ 1940 ییللرده خلقارا دینگیزلرگه قدم باسیش سیاستیگه موازی روشده تورکيه نینگ بوغازلر بیلن باغلیق طلبیدن سونگ، تورکيه کوپراق غرب بلاگی بیلن بیرگه حرکت قیله باشلهدی. 1952 ییلی ناتوگه اعضا بولدی. غرب بلاگی نینگ روسیهنی اورهب آلیش سیاستی اساسیده تورکيه ذمّهسیگه توشگن مسوولیتنی بجردی. ناتو هم اوزینی آشکارا تهدید قیلگن سابق سوویت اتفاقیگه قرشی تورکيه نینگ خوفسیزلیک احتیاجیگه حصه قوشدی.
ساووق اوروشدن سونگ، روسیه غرب اوچون 1-اساسي تهدید بولیشدن چیقدی. تورکيه غرب بلاگی ترکیبیده، ناتوگه اعضا دولت صفتیده ذمّهسیدهگی مسوولیتنی بجریشده دوام ایتماقده. بیراق، بو نینگ عوضیگه غرب دولتلردن بیران ایلیق مناسبتنی کوره آلمهیاتیر. تورکيه میلیونلب سوريهلیک قاچقینلرنی قبول قیلگن حالده، غرب نینگ دموکراسیسی گه و برقرارلیگی گه حصه قوشماقده، قالهویرسه غرب دولتلرینی فاشیزم و ناسیزم گِردابیگه توشیشدن قوتقرماقده. بونگه قرهمهی، تورکيه سوريهدن کیلیب چیققن خوفسیزلیک تهدیدلریگه قرشی یالغیز تشلب قوییلدی. حتا، تورکيه حاضرده ناتوگه اعضا بولیشیگه قرهمهی، اساسن امریکا قوشمه ایالتلری حکومتی سیاستی نینگ آشکارا تهدیدیگه اوچرهماقده. احتیاجی بولگن پتریات تیزیملرینی خرید قیلیش ایستهگی امریکا قوشمه ایالتلری تامانیدن رد ایتیلگنی ییتمهگندیک، اوروش اورتهسیده امریکا قوشمه ایالتلری و جرمني تامانیدن کیلتیریلگن پتریاتلر هم توخته تیلدی.
بوندن تشقری، تورکيه نینگ 50 مینگ اهالیسینی یوق قیلگن ترور تشکیلاتی پی کاکا و بو گروه نینگ سوريهدهگی ترماغی پی وای دی بیلن امریکا قوشمه ایالتلری نینگ همکارلیک قیلیشی تورکيه تامانیدن حقلی روشده قبول قیلینمهیاپتی. بو تورکيه تامانیدن «چیگره حدودلریده بیر ترور دولتی تشکیل قیلیش ریجهسی» صفتیده ملاحظه قیلینماقده. قالهویرسه، تورکيه پی وای دی ترور تشکیلاتیگه 7 مینگ ته تیرل حربي تخنیک ییتکزیلیشیگه قطعیاً قرشی چیقماقده.
تورکيه نینگ خوفسیزلیک احتیاجی کورمسلیککه آلینیب، اونینگ اوزینی حمایه قیلیشی اوچون ضرور بولگن تکنالوژي بیریلمس ایکن، تورکيه نینگ اوزینی مدافعه قیلیشی اوچون روسیه، چین و باشقه دولتلر بیلن همکارلیک قیلیشی طبيعي دیر. مملکتده حکومت تیپهسیده قَیسی حزب حکمران بولیشیدن قطعي نظر، دولتی نینگ کیلهجگینی اویلهگن هر بیر حزب وطنینی حمایه قیلیش اوچون غرب دولتلردن یاردم کورمهگنیده، باشقه الترناتیف یوللرنی قیدیرمسدن جیم قرهب توره آلمهیدی. تورکيهدن بونی کوتیش سادّهلیکدن باشقه نرسه ایمس.
امریکا قوشمه ایالتلری نینگ سیاست (یونهلیش) اوزگرتیریشی…
بوگون آلمان، جاپان و جنوبي کوریا کبی دولتلر حلی هم امریکا قوشمه ایالتلری نینگ حمایهسی آستیدهدیر. اولر امریکا قوشمه ایالتلری تامانیدن تأمینلنگن بو حمایه آستیده برقرار رواجلنیشینی دوام ایتتیرماقدهلر. تورکيه هم ساووق اوروش دوریده منه شوندهی حمایه آستیگه آلینگن ایدی. بیراق، بوگونگی جریانده تورکيهنی حمایه قیلیش او یاقده تورسین، اونینگ خوفسیزلیگیگه آشکارا تهدید سالماقدهلر. (شرقي آقدینگیزیدهگی تورکيهگه قرشی سیاست، سوريه انقراضی، فتو، س-400، ایف-35 دن تورکيه نینگ چیتلهتیلیشی و ...)
تورکيه ناتو ترکیبیده ییللر مابینیده ذمّهسیگه توشگن مسوولیتنی بجرگن دولت حسابلنهدی. بوگونگی کونده هم شوندهی. شو سببلی آخرگی ییللرده اوز یولینی اوزگرتیریش توشونچهسی تورکيهگه نسبتاً ایمس، بلکه اساسن امریکا بیلن تیگیشلی دیر.
امریکا قوشمه ایالتلریدهگی یونهلیش اوزگریشی فقطگینه تورکيهگه قرهتیلگن ایمس. امریکا قوشمه ایالتلریگه قوشنی دولتلر مکسیکو، کانادا و اروپا اتفاقی دولتلری هم بو سیاست نتیجهلریدن ضرر کورماقده. قالهویرسه، ایران، شمالي کوریا، لاتین امریکا دولتلری، روسیه و چین بیلن یوزهگه کیلگن کیسکینلیکلرنی بو معناده ملاحظه قیلیش ممکن.
امریکا قوشمه ایالتلری نینگ سیاستینی کیسکین اوزگرتیریش سببلری باشقهچه نیت نینگ نتیجهسی بولیشی ممکن. بو سببلر فقطگینه ساووق اوروشدن کیین اوزگرگن وظیفهلر آرهسیده ایمس، بلکه گلوباللشوو جریانیدن امریکا قوشمه ایالتلری نینگ و غرب دولتلری نینگ ییترلی درجه ده منفعت قولگه کیریتالمهگنلیگی، شو سببلی امریکا قوشمه ایالتلری نینگ گلوبال حکمرانلیگینی قولدن بای بیریش قورقووی بیلن اوّلگیدن فرقلیراق سیاست یوریته باشلهگن بولیشی ممکن.
ناتو و امریکا قوشمه ایالتلری اورتهسیدهگی مناسبت فرقی…
امریکا قوشمه ایالتلری مدافعه وزیرلیگی وکیلی پتریک شهنهههن تورکيه ملي مدافعه وزیری خلوصی آقرگه یولّه گن مکتوبده، تورکيه نینگ روسیهدن س-400 راکت مجموعهلرینی خرید قیلیشی امریکا قوشمه ایالتلری و ناتو بیلن همکارلیگی گه ضرر ییتکزیشی، قالهویرسه مدافعه سکتوری و اقتصادي همکارلیک، خلقارا تجاري فعالیتلر هم بوندن ضرر کوریشی قید ایتیلگن ایدی.
شهنهههن «اگر تورکيه س-400 مجموعهلرینی خرید قیلگن تقدیرده، ف-35 واسطهلرینی خرید قیله آلمهسلیگینی» هم افاده ایتگن.
بو مکتوب نینگ اوزیگینه تورکيه نینگ اوز خوفسیزلیگینی باشقهلرگه ایشانه آلمهسلیگینی کورسهتهدی. بوندن اوّل بیر نیچه دولت همکارلیکده ایشلب چیقریش توغریسیده قرار آلگن ف-35 واسطهلریدن تورکيه نینگ چیتلشتیریلیشی بیلن تهدید قیلینماقده.
س-400 مجموعهلری نینگ خرید قیلینیشیدن تورکيه-ناتو مناسبتلری ضرر کورمسلیگی شخصن ناتو باش منشیسی تامانیدن تیلگه آلیندی. باش منشی جینس ستولتینبرگ «ناتوگه اعضا دولتلر اوزینی حمایه قیلیشگه حقلی» ایکنلیگینی افاده ایتگن ایدی.
خلاصه قیلهدیگن بولسهک، تورکيه غرب دولتلر و امریکا قوشمه ایالتلری بیلن سالیشتیریلگنده بلکه اوز خطی-حرکتینی، مناسبتینی جوده آز اوزگرتیرگن دولت ایکنلیگینی ایتیش ممکن. تورکيه تاریخي اتفاقچیلیککه برهم بیریش نیتیده ایمس. اصلیده، تورکيه نینگ خوفسیزلیگی گه اهمیت بیرمهگن، ترور تشکیلاتلری بیلن تیل بیریکتیرگن حالده تورکيه چیگرهلری اطرافیده ترور دولتی توزیشگه کیریشگن بعضی غرب دولتلری و اینیقسه امریکا قوشمه ایالتلری نینگ اوز یونهلیشیدن و اوز یولیدن ادهشگنلیگینی ایتیش ممکن.
شوندهی ایکن، تورکيه س-400 یاکه بونگه اوخشهش مدافعه واسطهلرینی خرید قیلگن حالده اوز خوفسیزلیگینی اورنه تیشدن نیمه اوچون واز کیچسین؟
انقره ییلدیریم بایزید عالی بیلیم یورتی سیاست علملر فآقولته سی باشلیغی پروفیسور قدرت بلبل نینگ موضوع بیلن تیگیشلی یازووینی تقدیم ایتدیک.