یاره پلستری حقیده بیر یازوو
برنامه
یاره پلستری حقیده بیر یازوو
هرکس باله لیک چاغیده ییقیلیب ایاق ویا قولی یاره لنگن دیر. اینیقسه کیچیک یاشده گیلر کوچه ده، مکتبده ویا اویده اورتاقلری بیلن اوینه گونچه دقتسیز حرکتلر ایتیب ییقیلب یاره لنه دی. اوشبو ایاق قولده گی کیچیک یاره لرگه عاجل مداخله کیره ک بوله دی. اوشبو عاجل مداخله یاره پلستریدن عبارت. خوف کوریلگنده کیچیک بیراق حیات قوتقره دیگن درجه ده مهم بولگن یاره پلسترینی ایلک مرته کیم اختراع قیلدی؟
مخترع امریکالیک ارل دیکسون دیر. میلادی 1920 ییللریده امریکا قوشمه ایالتلریده گاز بنداج و پانسمان موادلری ایشلب چیقرووچی بیر ساغلیک شرکتیده ایشله یاتگن ارل دیکسون نینگ تورموش اورتاغی جوزفين اوقات بیشیریش نی یخشی کورگن بیر خاتین ایدی، بیراق کوپ دقتسیز ایدی. اویده ایش قیلگونچه قولینی یاره له ماقده ایدی. تورموش اورتاغی نینگ قولینی دواملی پانسمان قیلیش گه مجبور بولگن دیکسون بو کبی کیچیک یاره لر اوچون بیر پارچه گاز بنداج نینگ اورنیده یاپیشووچی نرسه دن ایش آلماقده ایدی. بیراق هر مرته بو ایککی موادنینگ یاره لرگه کوره کیسیش کیره کدی و بو کوپ وقت آلماقده ایدی. خوددی شو پیتده ارل دیکسون نینگ ایسی گه بنداج بیلن یاپیشووچی موادنی بیرلشتیریش فکری کیلدی.
دیکسون شو اوچون جراحی بیر نوارنینگ اورته سیگه بیر گاز بنداج نی قتلب قویدی. کیین بنداج نینگ یاپیشیشی اوچون "کرولین" دیب اتلگن یاپیشووچی بیر لته بیلن قاپله دی و نوار شکلی گه کیلتیردی. شونده ی بولیب جوزفین احتیاجی بولگن پیتلرده بو نواردن خواهله گن شکلده کیسیب یاره نینگ اوستی گه یاپیشتیرردی. دیکسون بو اختراعینی تجاری ایتیب ایش آلیشی نینگ ممکن ایکن لیگینی کورگن شرکت باشقرووی هم قیسقه بیر مدت کیین "نوار ایر" مارکی بیلن ایلک قولدن توزه تیلگن یاره پلسترینی بازارگه چیقردی. باشده اولکه مقیاسیده اونچه لیک ساتیلمه دی بیراق شرکت نینگ بازاریابلیک بولیمی او پیتلرده امریکا قوشمه ایالتلریده گی باله لر کوپ رغبت کورگن بیر سپورت بولگن تاغچیلیک کلوپلری بیلن کیلیشیب آلدی. تاغلرده سپورت قیلگن باله لر کیچیک یاره لر بیلن اوییگه قیتیب کیلرکن دیکسون نینگ معجزوی اختراعی بولمیش یاره نواریدن ایش آلیش گه باشلندی. شرکت اوزاق مدت بو ینگی محصول نی سپورتچیلرگه پولسیز بیردی و شونده ی بولیب یاره پلستری اویلرده عاجل وضعیت نرسه لری نینگ قطاریده اورین آلیش باشله دی. بو شکلده بیر مدت قول بیلن ایشلب چیقرگن ارل دیکسون بیر نیچه ییل کیین بازاری یخشی بولدی و ماشین آرقه لی ایشلب چیقریش گه باشله دی. ارل دیکسون شرکتی گه میلیاردلب دالر قازاندیرگن بو اختراعی بیلن شرکت باشلیغی اورین باسرلیگی گه ایریشدی.
چنگ، توپراق و کیرلی سوونینگ ایچیده گی ضررلی میکروپلرنینگ یاره گه تماس ایتیشی گه مانع بولگن پلستر شو شکلده انفکسیون توتمه یدی. پلسترنینگ اوستیده گی کیچیک تیشیکلردن آکسیجن یاره گه اوته دی و یاره نینگ ساغه ییب کیتیشی گه سبب بوله دی. بوگونگی کونده تورلی شکل و اندازه ده پلسترلر بار. یاپیشووچی پلستر قاله ویرسه سپری پلستر هم بار. بو سپری پلستر یاره نینگ اوستیگه جالی بیر ترماق تشکیل ایتیب یاره لی جاینی قوریقله یدی و ینگی تیری حجره لرنینگ یوزه گه چیقیشی گه سبب بوله دی. شونده ی بولیب ینگی تکنالوژی امکانیتلری بیلن ینگی عقللی پلسترلر هم ایشلب چیقریلدی. ینگی عقللی پلستلرنینگ اوستیگه جهاز اسبابلری جایلشتیریب یاره نینگ وضعیتی کنترول و تعقیب آستیگه آلینماقده. بو شکلده یاره گه داری کیره ک بولگن پیتده مداخله قیلیش ممکن بولماقده.
