تورکیه نینگ مطبوعات خلاصه لری
تورکیه نینگ مطبوعات خلاصه لری
![تورکیه نینگ مطبوعات خلاصه لری](http://cdn.trt.net.tr/images/xlarge/rectangle/e2e7/72a1/feea/5c7cc4dfd725f.jpg?time=1718754215)
تورکیه نینگ مطبوعات خلاصه لری
ستار روزنامه سی: «کویت خلقی دنیادهگی رهبرلر آرهسیده اینگ کوپ تورکيه دولت باشلیغی یاقتیردی» سرلوحهسی بیلن بیرگن خبرگه کوره، امریکا قوشمه ایالتلری فکر اویوشمه واشنگتن انستیتوتی تامانیدن کویتده آلیب باریلگن تدقیقاتده دولت باشلیغی ایردوغان کویت خلقی تامانیدن ارداقلنگن اینگ یخشی لیدر دیب تاپیلدی.
کویتده نشر قیلینگن القباس روزنامهسی اوشبو تدقیق نتیجهلرینی «کویتلیکلر امریکا قوشمه ایالتلری دولت باشلیغیی دونالد ترامپگه غضبلی، ایردوغاننی ایسه یخشی کورهدیلر» دیگن سرلوحه بیلن چاپ ایتدی.
تدقیقده کویتلیکلر نینگ 5 فایزی دونالد ترامپنی قوللب-قوّتلهگن، ایردوغان ایسه کویتلیکلر نینگ 64 فایزی نینگ سیوگیسینی قازانگنلیگی معلوم بولگن.
صباح روزنامهسی: «تورکيه نینگ تاریخینی نمایان قیله دیگن 6 میلیون کتاب» سرلوحهسی بیلن بیرگن خبرگه کوره، تورکيه دولت باشلیغیی رجب طیب ایردوغان ایتگنیدیک، استانبول دهگی رامی کتبخانهسیده قَیته ترمیملش فعالیتلری دوام ایتماقده. مذکور کتبخانه تورکيهدهگی اینگ کتّه کتبخانهلردن بیری بولیب حسابلنهدی.
اوشبو کتبخانهده 6 میلیون دانه کتاب اورین آلهدی. بونگه قوشیمچه روشده تخمیناً 10 میلیون کتاب سیغهدیگن ینه بیر اولکن کتبخانه قوریلیشی ریجهلشتیریلگن. کتابخانه قاشیده کورگزمهلر صالونلری و نمایشخانه قوریلیشی ریجهلنماقده.
شو بیلن بیرگه، کتابخوانلر و تدقیقاتچیلر اوچون قهوه خانه لر، کتاب دوکانلری، ساوغه اشیالری دوکانلری، قول صنعتلری محصولاتلری دوکانلری همده کوپلب صنعت اوستاخانهلری تشکیل ایتیلهدی.
حریت روزنامهسی: «هرمانقایا شلالهسی ادرینالین علاقه مندلرینی کوتماقده» سرلوحهسی بیلن بیرگن خبرگه کوره، تورکيه نینگ دوزجه ولایتی جمعهییری تومنیده طبیعت شیدالری نینگ مسکنیگه ایلنگن هرمانقایا شلالهسی یانیگه 600 مترلیک زیپلینه لینی قوریلهدی.
تخمیناً 2 ییل آلدین کشف ایتیلگن شلاله دوزجه شهر مدنیت و توریزم باشقهرمسی تامانیدن اطرافی کوکلمزارلشتیریلدی و حاضرده توریزمگه حصه قوشماقده.
بو شلاله تورکيه نینگ اینگ کتّه موترسایکل یوللری و رفتینگ سپورتی اوچون ریجه لنگن میلین سایی حوزهسیده جایلشگن. هرمانقایا شلالهسی و اونینگ اطرافیده تورلی طبیعت سپورتلری فعالیتلری عملگه آشیریلماقده.
یینی شفق روزنامهسی: «زوگمه و گوبیکلی تیپه تصویری تقینچاقلرده عکس ایتهدی» سرلوحهسی بیلن بیرگن خبرگه کوره، تورکيه نینگ غازی انتیب ولایتیدهگی بلوغلیک انستیتوتی صنعت کارخانهلریده زوگمه انتیک شهری و شانلی اورفا ولایتیدهگی تاریخي گوبیکلی تیپه نینگ تصویرلری عکس ایتگن تقینچاقلر یسهلیب باشلهدی.
انستیتوت نینگ زرگرلیک کارخانهسیده زوگمه موزائکلری و گوبیکلی تیپهدهگی تاشلر نینگ اوستیدهگی تصویرلردن نمونهلر آلینگن حالده تشکیل قیلینگن تقینچاق کالیکسيونیده عیاللر اوچون اوزوکلر، مرجانلر اورین آلگن. کیلگوسیده اوی دیکوراسیونیده ایشلهتیلهدیگن تورلی ماتریاللر هم ایشلب چیقریلیشی ریجهلنماقده.
کالیکسيون اساسیده تورکيه نینگ مهم تاریخي و توریستیک قدریتلرینی بوتون دنیاگه تنیتیش مقصد قیلینماقده.
خبر تورک روزنامهسی: «یاش قابلیتلیر صحنهگه چیقماقده» سرلوحهسی بیلن بیرگن خبرگه کوره، خلقارا یاش موسیقی شناسلر تنلاویگه اعتبار تاباره آرتیب بارماقده.
موسیقی ساحهسیده اوز قابلیتیگه ایشانگن یاشلر اوشبو تنلاوگه بی پول اشتراک ایتیشی ممکن. تنلاوگه مراجعتلر شو ییل نینگ 31 مارچ کونی یکونلنهدی. تنلاو غالبلری 14 اپریل کونی اوتکزیلهدیگن طنطنهلی مراسمده مکافاتلرینی قبول قیلیب آلهدیلر.