تورکیه نینگ مطبوعات خلاصه لری
تورکیه نینگ مطبوعات خلاصه لری
تورکیه نینگ مطبوعات خلاصه لری
یینی شفق روزنامه سی: «ترامپ نینگ کویاوی و باش مصلحتچیسی جرید کشنیر انقره‌ده» سرلوحه‌سی بیلن بیرگن خبرگه کوره، تورکيه خزینه و مالیه وزیری برات آلبیراق امریکا قوشمه ایالتلری دولت باشلیغی دونالد ترامپ نینگ کویاوی و باش مصلحتچیسی جرید کشنیر بیلن پایتخت انقره‌ده‌گی اوچره‌شوویگه دایر معلومات بیردی. برات آلبیراق: «کشنیر بیلن بولگن اوچره‌شوویمیزده دولتلریمیز اورته‌سیده‌گی اقتصادي همکارلیکنی ایزچیل دوام ایتتیریش و اونی ینه‌ده مستحکملشتیریشگه دایر آلیب باریله‌یاتگن تشبثلر بوییچه گپیردیک»،دیدی.
صباح روزنامه‌سی: «اقتصادي ایشانچ ایندیکسی آرتدی» سرلوحه‌سی بیلن بیرگن خبرگه کوره، تورکيه استاتیستیک تشکیلاتی فبروری آییگه دایر اقتصادي ایشانچ ایندیکسینی اعلان قیلدی. بونگه کوره، اقتصادي ایشانچ ایندیکسی اوشبو آیده اوتگن آیگه نسبتاً 1.2 فایز اوسدی. بو ایسه، 78.5 فایزدن 79.4 فایزگه اوسدی دیمکدیر. ایندیکسده‌گی اوسیش استعمالچی، ایشلب چیقریش صناعتی و خدمت سکتوری ایشانچ ایندیکسلریده‌گی آرتیشلردن کیلیب چیقدی. فبروری آییده ایشلب چیقریش صناعتی ایشانچ ایندیکسی 96.9 فایز، خدمت سکتوری ایشانچ ایندیکسی 79.5 فایزگه ایریشدی.
ستار روزنامه‌سی: «تورکيه‌دن روسیه‌گه بیر آیده عملگه آشیریلگن لیمو صادراتی 10 میلیون دالردن آشدی» سرلوحه‌سی بیلن بیرگن خبرگه کوره، تورکيه‌دن روسیه‌گه جنوری آییده 18 مینگ 60 تُن لیمو صادر قیلیندی. بوندن 10 میلیون 172 مینگ 644 دالر درآمد قولگه کیریتیلدی. روسیه‌گه اوتگن ییل 13 مینگ 69 تُن لیمو صادر قیلینگن ایدی. بوندن 8 میلیون 969 مینگ 50 دالر درآمد آلینگندی. ایکّی ییل ایچیده‌گی نتیجه‌لر مقایسه قیلینگنده روسیه‌گه لیمو صادراتی مقدار جهتیدن 38 فایز، قیمت جهتیدن ایسه 13.4 فایز آرتیش کورسه‌تدی.
وطن روزنامه‌سی: «تورکيه دم آلیشده صنعي کول» سرلوحه‌سی بیلن بیرگن خبرگه کوره، تورکيه نینگ ایرزوروم ولایتی عزیزيه تومنیگه سیاحلرنی جلب قیلیش مقصدیده دَم آلیش مرکزلری تشکیل ایتیلماقده. اوشبو مؤسسه‌لر قاشیده صنعي کول تشکیل قیلینماقده. مذکور دَم آلیش مسکنی دولت اقتصادی گه و توریزمگه حصه قوشیشی مقصد قیلینماقده. پروژه اساسیده 670 جریب زمین گه دَم آلیش جای‌لری برپا ایتیله‌دی. بیولوژیک کول نینگ عمومي دیپولش حجمی 90 مینگ متر مکعبنی تشکیل قیلگن بولیب، کول میدانی 85 مینگ متر مربع، اوزونلیگی ایسه 1115 مترنی تشکیل قیله‌دی.
خبر تورک روزنامه‌سی: «دنیاده‌گی اینگ یخشی 25 ته هوتل انیقلندی و رویخطده تورکيه‌دن 2 ته هوتل بار» سرلوحه‌سی بیلن بیرگن خبرگه کوره، TripAdvisor هوتل‌لر و رستورانتلر سایتی "Travelers’ Choice 2019" رویخطینی اعلان قیلدی. بو رویخط، اوشبو سایتده‌گی هوتل و رستورانتلرگه سیاحلر تامانیدن بیریلگن بها نتیجه‌سیده تیارلندی. رویخطده دنیا نینگ اینگ یخشی 25 ته هوتلی آره‌سیده تورکيه‌دن هم 2 ته هوتل ا‌ورین آلدی. تورکيه‌دن رویخطگه کیریتیلگن هوتل‌لردن بیرته سی استا‌نبولده جایلشگن، کیینگیسی ایسه کپه‌دوکيا شهریده ا‌ورین آلگن.
