طالبان باشقرووی اولکه ده تیزیملی اردو قوره جگیدن خبر بیردی

افغانستانده کنترولنی قولگه کیریتیب آلگن طالبان یقین پیتده اولکه ده تیزیملی اردو قوره جگینی بیلدیردی.

طالبان حکومتی نینگ قوراللی کوچلر قومندانی قاری فصیح الدین پایتخت کابلده بیر کنفرانسده قیلگن صحبتیده اولکه ده گی حربی تیزیم بیلن تیگیشلی طالبان باشقرووی نینگ ریجه لری بوییچه معلومات بیردی.

افغانستانده کوچلی و تیزیملی اردو قوریش اوچون مصلحت و فعالیتلرنینگ دوام ایتیب تورگن لیگینی معلوم قیلگن فصیح الدین بونینگ یقین پیتده عملی بوله جگینی افاده ایتدی.

شونده ی بولیب اولکه ده اتنیک و مقاومت اساسیده قوزغالان گه قول اورگنلرنی باستیره جکلرینی معلوم قیلیب مقاومتچیلرنینگ اولکه نی ایچکی اوروش گه آلیب بارماقچی ایکن لیگینی ایتدی.

افغانستانده 34 ولایتدن 33 ته سی طالبان نینگ کنترولی آستی گه توشگندی، بیراق پایتخت کابل نینگ شمالیده جایلشگن پنجشیر ولایتی محلی گروهلرنینگ کنترولیده قالگندی.

ملی مقاومت جبهه سی آتی بیلن ییغیلگن گروپلرگه سابق جهادی قومندانلردن احمد شاه مسعودنینگ اوغلی احمد مسعود رهبرلیک قیلماقده ایدی.

طالبان 8 سپتامبر تاریخیده پنجشیرده گی گروپلر بیلن توقنه شوولرنینگ اداغگه ییتیب بارگن لیگینی و منطقه نینگ کنترولینی قولگه کیریتیب آلگن لیگینی بیلدیرگندی.

خوددی شو کونی اناطودولی آژانسی پنجشیرنینگ مرکزیگه کیرگن ایلک مطبوعات ارگانی بولیب ولایت نینگ مرکزی بازارک نی تصویرگه آلگندی.

بازارکده طالبان کوچلری تامانیدن کنترول تامین ایتیلگن و تاغلیک منطقه لرده وقت وقتی بیلن توقنه شوولر یوز بیرگن لیگینی تثبیت ایتگندی.