فاریاب ولایتیده دولت آباد تومنی نینگ کنترولینی خوفسیزلیک کوچلری قولگه کیریتیب آلدی

افغانستانده 8 جون تاریخیده طالبان نینگ قولی گه توشگن فاریاب ولایتی نینگ دولت آباد تومنی نینگ کنترولینی حکومت کوچلری قیته دن قولگه کیریتیب آلدی.

فاریاب امنیه قومندانلیگی سوزچیسی کریم یوریش مطبوعاتگه بیرگن بیاناتده خوفسیزلیک کوچلری نینگ دولت آباد تومنینی قیته ریب آلیش اوچون عملیات اویوشتیرگنینی ایتدی.

خوددی شو عملیات نتیجه سیده دولت آباد تومنی مرکزی نینگ طالبان نینگ قولیدن قیته ریب آلینگن لیگینی معلوم قیلگن یوریش انچه طالبان گروهی منسوبی تروریست جنگری نینگ اولدیریلگن لیگینی بیلدیردی.

یوریش طالبان جنگریلری بیلن خوفسیزلیک کوچلری اورته سیده تومن مرکزی گه اوزاق منطقه لرده توقنه شوونینگ دوام ایتیب تورگن لیگینی افاده ایتدی.

موضوع بوییچه طالبان تامانیدن حلی گچه بیانات بیریلمه دی.

ینه ایککی کون آلدین اولکه نینگ شمالیده جیالشگن سرپل ولایتی نینگ صیاد تومنی مرکزی نینگ کنترولی طالبان گروهی نینگ قولیگه توشگندی.

سونگگی ایککی آیده اولکه مقیاسیده طالبان نینگ کنترولی گه اوتگن تومن سانی 15 گه ییتدی.

بیرلشگن ملتلر تشکیلاتی نینگ راپوریگه کوره طالبان گروهی شهر مرکزلریدن تشقری اولکه توپراقلری نینگ 50-70 فایزینی قولگه کیریتیب آلگن وضعیتده.

طالبان اولکه مقیاسیده 407 ته تومندن 90 تومن مرکزینی قولگه کیریتیب آلگن. بولردن 60 ته سی نینگ بعضی بیر قصبه لری خوفسیزلیک کوچلری نینگ کنترولیده دیر.

افغانستان نینگ 34 ته ولایت مرکزیده کنترول بوتونله ی دولت نینگ قولیده دیر.