غنی بیلن خلیلزادنینگ اوچره شووی بولیب اوتدی

افغانستان جمهور باشلیغی اشرف غنی، امریکا قوشمه ایالتلری نینگ افغانستان خاص نماینده سی زلمی خلیلزاد بیلن ملاقات قیلدی.

جمهور رئیس لیک تامانیدن بیریلگن بیاناتده، غنی نینگ آلتینچی مرته چیققن تینچ لیک اوچره شوولریدن قیتیب کیلگن خلیلزاد بیلن جمهور رئیس لیک قصریده اوچره شگن لیگی بیلدیریلدی.

خوودی شو اوچره شووده تینچ لیک اوچره شوولری حقیده کوریشگن لیکلری و تینچ لیک اوچره شوولری نینگ دوام ایته جگی معلوم قیلیندی.

خلیلزاد تینچ لیک اوچره شوولری آلتینچی سفری چوکاتیده توناون کونی افغانستان عالی صلح کینگشی باشلیغی محمد عمر داودزی، تینچ لیک مذاکره هیئتی و خاتین – قیز نماینده لری بیلن اوچره شدی.

افغانستان دولت باشلیغی اشرف غنی نینگ باشقروویده گی حکومت اوچون کتته خطردن عبارت طالبان گروهی حلی هم مملکت نینگ انچه منطقه سی نینگ کنترولینی اوز قولیگه آلیب تورگن.

حکومت طالبان گروهی بیلن تینچ لیک اوچره شوولریگه باشلش اوچون انچه فعالیت قیلیب تینچ لیک کینگشی ایجاد ایتگن حالده حلی گچه هیچ بیر نتیجه قولگه کیریتیلمه گن.

سابق جمهوررئیس حامد کرزی نینگ حکومتیده هم افغانستان رهبریتی طالبان بیلن مذاکره قیلیش گه حرکت قیلدی. اوشبو مذاکره لرنینگ 2013 – ییل جون آییده دوحه ده بولیب اوتیشی ریجه لنگن ایدی.  بیراق طالبان نینگ دوحه ده گی دفتری نینگ لوحه سی گه "افغانستان اسلام امیرلیگی" شکلیده یازدیریشی و اوزیچه بیراغینی آسیشی نینگ آرتیدن افغانستان حکومتی مذاکره دن واز کیچگن ایدی. 

شونده ی قیلیب طالبان نینگ دوحه ده گی دفتری یاپیلرایکن, تینچ لیک مذاکره لری هم توختب قالگن ایدی.