اشرف غنی: طالبان سیاسی حزب صفتیده تن آلینسین
جمهوررئیسی اشرف غنی اوشبو مطلب نی کابل کنفرانسی جریانیده بیلدیردی
افغانستان جمهوررئیسی محمد اشرف غنی پایتخت کابلده تینچ لیک پروسه سی کنفرانسی جریانیده بیرگن بیاناتلریده طالبان بیلن بوله دیگن مذاکره لر باره سیده هم بحث ایتدی.
جمهوررئیسی غنی اوشبو مذاکره لر نینگ آلیب باریلیشی اوچون سیاسی بیر چوکات نینگ تشکیل ایتیلیشی نینگ ضروری ایکن لیگی نی معلوم قیلدی.
اشرف غنی افغانستان دولتی بیلن طالبان اورته سیده مذاکره آلیب باریله آلیشی اوچون طالبان نینگ سیاسی بیر حزب اوله راق تن آلینیشی کیره ک ایکن لیگی نی بیلدیردی.
جمهوررئیسی غنی شونده گینه دولت بیلن طالبان اورته سیده اوز ارا ایشانچ پیدا بوله دیگن لیگی, ایرکین و عادلانه بیر سیلاو امکانیتی نینگ یره تیله دیگن لیگی نی ایسله تیب اوتدی.
امریکا قوشمه ایالتلری هم طالبان نینگ مذاکره امکانیتی نی قولدن بیرمه گن لیگی نی بیلدیرگن ایدی.
طالبان گروهی تامانیدن بیریلگن بیاناتده ایسه, اوشبو گروه نینگ افغانستانده تینچ لیک نینگ اورنه تیلیشی اوچون امریکا قوشمه ایالتلری بیلن مذاکره قیلیش گه تیار ایکن لیگی بیلدیریلگن ایدی.
بیراق طالبان گروهی قطرده گی نماینده لیگی واسطه سی بیلن آلیب باریلیشی تقدیرده گینه اوشبو مذاکره پروسه سی نی قبول قیله دیگن لیگی نی معلوم قیلگن ایدی.
معلوم بیر مدت آلدین امریکا قوشمه ایالت لری جنوبی و مرکزی آسیا بوییچه تشقی ایش لر وزیری اورینباسری الیس ولز بیرگن بیاناتلریده, افغانستانده تینچ لیک نینگ اورنه تیلیشی توغری سیده طالبان نینگ حاضرگی کونده هم واشنگتن رهبریتی بیلن مذاکره قیلیش امکانیتی گه ایگه ایکن لیگی نی بیلدیرگن ایدی.
بیراق افغانستان جمهوررئیسی محمد اشرف غنی نینگ خوفسیزلیک بوییچه مصلحتچیسی محمد حنیف اتمر بیر هفته آلدین شرق الاوسط روزنامه سی بیلن قیلگن مصاحبه سیده طالبان نینگ قطرده گی نماینده لیگی نینگ یاپیلیشی کیره ک ایکن لیگی نی ایسله تیب اوتگن ایدی.
