хитай сақчилириниң түрк експортчиларни аварә қилғанлиқи илгири сүрүлди

түркийә авази радийоси хәвири: һөррийәт гезитиниң хәвәр қилишичә, өткән һәптә бейҗиңда өткүзүлгән ашлиқ йәрмәнкисигә иштирак қилиш үчүн барған  түрк данлиқ мәһсулатларни експорт қилғучилар бирликиниң 52 ширкәт вәкили хитай хәвпсизлик хадимлириниң сәһәр пәйтидики йочун сорақлириға дуч кәлгән.

бу ишни баштин кәчүргән мәзкур бирликниң муавин башлиқи һидайәт қадироғлу, чеградин киридиған чағдики паспорт тәкшүрүшидә «немишқа кәлдиңлар, қанчилик турисиләр ?» дегәндәк соаллар билән хели узун сорақ қилинған болушиға қаримай, аридин бир саәт өткәндин кейин сақчиларниң меһманханиға келип мәзкур соалларни қайта сориғанлиқини, бир қәдәр ичкириләп тәкшүргәндин кейин бу ишниң хелидин буйан мунтизим һалда давамлишип келиватқанлиқиниң оттуриға чиққанлиқини билдүргән.

хәвәрдә көрситилишичә,  рус айропилани чүшүрүветилгән 2015 – йилиниң ахирлири башланған түркийә – хитай мунасивәтлиридики совуш, виза беришни қийинлаштуруш билән башлиған болуп, түркийә русийә билән болған мунасивәтләрни түзәткән, һәтта җумһур рәис рәҗәп таййип әрдоғанниң 20 дөләт гуруһи йиғинида җәрйанида имзалиған келишимлиригә қаримай  тәл – төкүс әслигә келип болалмиған.

хәвәрдә йәнә, һидайәт түркоғлуниң бешиға кәлгән ишларға хапа болмиғанлиқини, әксичә експортчиларниң түркийәгә даир хата учурларни түзитиш үчүн күрәш қилидиғанлиқини билдүрүп, «експортчи достлиримиз бу хата тонушни өзгәртиш үчүн һәрикәткә өттуқ. хитай шериклиримизни коллектип һаләттә түркийәгә елип келиш үчүн учришиш өткүздуқ. түркийәниң уруш һалитидики бир дөләт әмәсликини көрситимиз. хитайлар кападокйани наһайити йахши көриду. уларни у йәрдә меһман қилимиз. талла базири сетивалғучилири, ашлиқ саһәси вәкиллиридин тәшкил тапқан 20 кишилик алаһидә сетивелиш һәйити декабир ейида түркийәгә келиду. арқидин март ейида башқа бир һәйәтни күтүвалимиз. бу җәрйанда баштин кәчүргәнлиримизни доклат һалитидә иқтисад министирлиқиға билдүримиз» деди.

йәнә бир тәрәптин,  18 кишилик бир түркийә һәйитиниң хитай тәрәп билән түркийәгә сайаһәтчи әвәтиш бойичә келишим түзгәнлики, келишимниң 2017 – йили бойичә хитай даирилириниң  түркийәгә кәм дегәндиму бир милйон  сайаһәтчи әвәтишини мәзмун қилидиғанлиқи тоғрисида хәвәрләр чиққаниди.