әрдоған билән санчез сода мунбири йиғиниға қатнашти

дөлитимиз (түркийә җумһурийити) җумһур рәиси рәҗәп таййип әрдоған билән испанийә баш вәзири педро санчез 8 – нөвәтлик испанийә – түркийә һөкүмәтләр ара башлиқлар йиғини даирисидә, мадридта чақирилған сода мунбири йиғиниға қатнашти.

2152642
әрдоған билән санчез сода мунбири йиғиниға қатнашти

түркийә авази радийоси хәвири: түркийәдин 150 гә йеқин сода – санаәтчи билән испанийә сода – санаәтчилирини бир йәргә җәм қилған сода мунбири йиғининиң ечилишиға, җумһур рәис рәҗәп таййип әрдоған билән испанийә баш вәзири педро санчезму иштирак қилди.

җумһур рәис әрдоған бу йәрдә қилған сөзидә, исраилийәниң ғәззәдә йүргүзүватқан қәтлиамлириға йәнә бир қетим наразилиқ билдүрүп мундақ деди:

«нөвәттә биз уруш тохтитиш чақириқлириға қан төкүш арқилиқ җаваб қайтуруштәк тәкәббурлуққа дуч келиватимиз. һәрқандақ виҗданлиқ бир дөләтниң бундақ позитсийәни қобул қилиши әсла мумкин әмәс.»

испанийәниң исраилийәниң зулум – ситәмлири алдида намайан қиливатқан мәйданидин интайин миннәтдар икәнликлирини әскәрткән җумһур рәис әрдоған, мундақ дәп көрсәтти:

«баш вәзир санчез әпәндим (пәләстин мәсилисидә) пиринсипал вә ақиланә сийасәтни йолға қойди, бу арқилиқ  пәләстин вә түркийә хәлқиниң қәлбидин чоңқур орун алди.»

әрдоған испанийәниң ғәззәгә тутқан позитсийәсигә рәһмәт ейтти, һәмдә түркийәниң дости шималий атлантик әһди тәшкилатидики иттипақдиши испанийә билән болған мунасивәтлириниң һәр саһәдә наһайити йахши икәнликини тәкитләп мундақ деди:

«сода - санаәтчилиримизгә охшимиған саһәләрдики паалийәтлиримиз арқилиқ йеңи һәмкарлиқ пурсәтлирини йаритип беришимиз керәк. шундақ қилғандила андин дөләтлиримизни парлақ келәчәк мәнзилгаһиға йәткүзәләймиз.»

испанийә баш вәзири педро санчезмундақ деди:

«түркийә испанийә үчүн муһим иқтисадий шерик вә районидики муһим актийордур. испанийә билән түркийә һәр саһәдә мунасивәтлири әң йахши дөләтләр һесаблиниду.»



مۇناسىۋەتلىك خەۋەرلەر