сүрийәгә һавадин йардәм бериш пилани
америка қошма иштатлири, әнглийә вә фирансийә бирләшкән дөләтләр тәшкилатини инсанпәрвәрлик йардәмләрни сүрийәдики қоршав астидики районларға һавадин йәткүзүп беришкә чақирди.
түркийә авази радийоси хәвири: үч дөләт сүрийә һөкүмитиниң илгири һасил қилинған келишимгә әмәл қилмиғанлиқини вә инсанпәрвәрлик йардәмләрни 1 – ийунғичә қоршав астидики районларға йәткүзүшкә рухсәт қилиш мәсилисидә мәсулийитини ада қилмиғанлиқини билдүрди.
мәлуматларға қариғанда, бирләшкән дөләтләр тәшкилати хәвпсизлик кеңишиниң әтә чақирилидиған йиғинида инсанпәрвәрлик йардәмләрни сүрийәдики қоршав астидики районларға һавадин йәткүзүп бериш мәсилиси музакирә қилинидикән.
йиғин һарписида америка билән әнглийә москва билән теһрандин тәсир күчини ишқа селип, сүрийә һөкүмитигә бесим ишлитип, инсанпәрвәрлик йардәмләрни сүрийә хәлқигә һавадин йәткүзүп беришкә рухсәт қилишини қолға кәлтүрүшкә чақирди.
бирләшкән дөләтләр тәшкилатиниң мәлуматлириға қариғанда, сүрийәдә тәхминән 600 миң киши қоршав астида йашайдиған болуп, инсанпәрвәрлик йардәмләрни йәткүзүш қийин болған районларда йашаватқанларниң сани 4 милйон 600 миңдин ашидикән.
сүрийә һөкүмитигә қарши исйан башланған шәһәрләрдин бири болған дера уда 4 йилдин буйан сүрийә армийәсиниң қоршави астида икән.
бирләшкән дөләтләр тәшкилати даирилири апрелда шәһәрдә йемәк – ичмәк, пакизә су вә дора қатарлиқ даимий еһтийаҗлиқ нәрсиләрниң адәттин ташқири дәриҗидә кәмчил икәнликини билдүргәниди.
мәлуматларға қариғанда, районда ток билән тәминләш хизмити буниңдин үч йил бурун тохтап қалған, шәһәргә түнүгүн 2012 – йили нойабирдин буйан тунҗи қетим пәқәт ваксина, бовақ сүти вә дорила әвәтиш мумкин болған.
