باغدادتا خەۋپسىزلىكنى ئاساس قىلغان مۇھىم يىغىن ئېچىلىدۇ

تۈركىيە ئاۋازى رادىيوسى خەۋىرى: تاشقى ئىشلار مىنىستىرلىقى خاقان فىدان باشچىلىقىدىكى بىر ھەيئەتنىڭ مۇھىم ئۇچرىشىش ئۈچۈن ئىراق پايتەختى باغدادنى زىيارەت قىلىدىغانلىقى توغرىسىدا بايانات ئېلان قىلدى.

باياناتتا، خاقان فىدان باشچىلىقىدىكى ھەيئەتنىڭ، تۈركىيە بىلەن ئىراق ئوتتۇرىسىدا ئۆتكۈزۈلۈۋاتقان خەۋپسىزلىكنى ئاساس قىلغان ئۇچرىشىشلار رامكىسىدا ئىراق تاشقى ئىشلار مىنىستىرى فۇئاد ھۈسەيىننىڭ ساھىبخانلىقىدا ئەمەلگە ئاشۇرۇلىدىغان يىغىنغا قاتنىشىش ئۈچۈن باغدادقا بارىدىغانلىقى قەيت قىلىندى.

باياناتتا، ھەيئەتتە دۆلەت مۇداپىئە مىنىستىرى ياشار گۈلەر، ئىستىخبارات ئىدارىسى باشلىقى ئىبراھىم قالىن ۋە مۇئاۋىن ئىچكى ئىشلار مىنىستىرى مۈنىر كارائوغلۇنىڭ بارلىقى ئەسكەرتىلدى.

يىغىندا، تېررورلۇققا قارشى كۈرەش، خەۋپسىزلىك ۋە ھەربىي ھەمكارلىق قاتارلىق ئىككى تەرەپنىڭ كۈنتەرتىپىدىكى مەسىلىلەرنىڭ كەڭ دائىرىدە مۇزاكىرە قىلىنىدىغانلىقى بىلدۈرۈلدى.