әрдоған исираилийәниң бовақлар үчүн җавабкарлиққа тартилиши керәкликини ейтти
җумһур рәис рәҗәп таййип әрдоған: «исираилийә мәсуллири ирқий қирғинчилиқниң һәқиқитини йошурушниң орниға, ғәззәдә җенидин айрилған бовақларниң һесабини бәрсун» деди.
түркийә авази радийоси хәвири: җумһур рәис рәҗәп таййип әрдоған баш әлчиләргә берилгән иптар зийапитидә сөз қилди.
у тинчлиқ ейи болған рамизанни (11-март-9-апрел) ғәззә қатарлиқ йеқин әтрапта йүз бериватқан вәқәләр сәвәбидин ғәмкин күтүвалғанлиқлирини билдүрүп: «ғәззә вә ишғал қилинған земинларда исираилийәниң бәш айдин буйан давамлишиватқан һуҗумлирида 32 миң қериндишимиз шеһит болди. 73 миң пәләстинлик йариланди. ғәззә исираилийәниң вәһшийанә һуҗумлири нәтиҗисидә, дунйаниң әң чоң кичик бала вә айаллар мазарлиқиға айланди. биз буни дегән вақтимизда, исираилийә баш министири нетанйаһу вә җинайәт шайкиси биарам болиду. һәммә йолни синап бақти, әмма рәҗәп таййип әрдоғанниң һәқни вә һәқиқәтни варқиршиға һәргизму тосқунлуқ қилалмиди. бизниң қатилни қатил дәп атишимизға тосқунлуқ қилалмайду. исираилийә мәсуллири ирқий қирғинчилиқниң һәқиқитини йошурушниң орниға, ғәззәдә җенидин айрилған бовақларниң һесабини бәрсун. бир чимдим ун, бир бағлам тәййар чөп, бәлким бир тоғрам нан елиш үчүн өчирәттә сақлаватқан бигунаһ кишиләрни өлтүргәнләрниң бизгә гәп қилидиған йүзи йоқ. түркийә илгирикидәк бүгүнму пәләстинлик қериндашлириға игә чиқиду. залимларниң қаршисида қәтий арқиға чекинмәйду. һәмммиз пәләстиндә өлтүрүлгән кичик балиларға қәрздармиз, буб қәрз пәқәт вә пәқәт мустәқил пәләстин дөлитиниң қурулуши билән төлиниши мумкин» деди.
