ئۇيغۇر ئېلىدە مەمۇر ۋە ئوقۇغۇچىلارغا روزا تۇتماسلىق ۋە ناماز قىلماسلىق توختامنامىسى ئىمزالاتقۇزۇلدى

تۈركىيە ئاۋازى رادىيوسى خەۋىرى: «‹تايمتۈرك› تور بېتى» نىڭ خەۋەر قىلىشىچە، خىتاي ھۆكۈمىتىنىڭ تۈرلۈك – تۈرلۈك چەكلىمىلەر سەۋبىدىن ئەڭ چوڭ «دالا تۈرمىسى» گە ئايلىنىپ قالغان ئۇيغۇر ئېلىدىن مۇسۇلمانلارنىڭ ئىبادەتلىرىنى چەكلەشكە دائىر خەۋەرلەر كەلمەكتە.

خەۋەردە دېيىلىشىچە، خىتاي ھۆكۈمىتى 6 – ئىيۇن دۈشەنبە كۈنى ئۈرۈمچىدە مەمۇرلار، ئوقۇغۇچىلار ۋە بالىلارغا «رامىزان ئېيىدا روزا تۇتمايمەن» دېگەن مەزمۇندىكى توختامنامىنى مەجبۇرىي ئىمزالاتقۇزغان. بۇنىڭدىن باشقا يەنە، 4 – ئىيۇن شەنبە كۈنى ئۇيغۇر ئائىلىلەرگە بىرەر پارچىدىن مەكتۇپ يوللاپ، «بالىلىرىڭلارنى ئىسلامدىن يىراق تۇتۇڭلار، ئۇنداق قىلمايدىكەنسىلەر قانۇنىي جاۋابكارلىققا تارتىلىسىلەر» دەپ تەھدىت سالغان. جۈملىدىن 4 – ئىيۇن شەنبە كۈنى ئائىلىلەرگە ئەۋەتىپ،  ئىمزالاتقۇزۇشى ئۈچۈن، ئۈرۈمچىدىكى 46 – تولۇق ئوتتۇرا مەكتەپكە  توختامنامە ئەۋەتىلگەن.

خەۋەردە ئەسكەرتىلىشىچە، توختامنامىنىڭ مەزمۇنى ئۇيغۇر ئېلىدىكى زۇلۇم – سىتەملەرنىڭ قايسى دەرىجىگە بېرىپ يەتكەنلىكىنىڭ ئەڭ روشەن نامايەندىسى ئىكەن.