уруш тохтитиш вә әсир алмаштуруш сөһбәтлири бүгүн ахирлишиду

түркийә авази радийоси хәвири: мисирниң  «әл қаһирә әл ихбарийә» телевизийәсиниң нам-шәрипини ашкарилашни халимиған бир йуқири дәриҗилик әмәлдариниң ейтишичә, тәрәпләр оттурисида өткүзүлүватқан ғәззәдә уруш тохтитиш вә әсир алмаштуруш сөһбәтлири бүгүн ахирлишидикән.

исираилийәниң рәфаһта вәзийәтни техиму кәскинләштүрүшиниң хәтәрлик икәнлики вә мисирниң һәр түрлүк сенарийәләргә тәййар икәнлики билдүрүлди.

«әл қаһирә әл ихбарийә» телевизийәсиниң түнүгүнки (7-май) хәвиридә, қаһирәдики сөһбәтләргә һамас, қатар вә америка вәкилләр өмикиниң қатнашқанлиқи қәйт қилинған иди.

һамас сийасий бийуросиниң башлиқи исмаил һәниййә 6-май қатар билән мисирға уруш тохтитиш келишими тәклипини тәстиқлиғанлиқлирини уқтурған иди.

һамас қатар вә мисир тәрипидин йәткүзүлгән «уруш тохтитиш тәклипи» ни тәстиқлиғанлиқини уқтурғандин кейин, исираилийә уруш кабенти рәфаһқа һуҗум қилишни давамлаштурушни қарар қилған иди.

исираилийә армийәси түнүгүн әтигән (7-май) рәфаһқа қуруқлуқтин һуҗум қилип, ғәззәниң мисир чеграсидики районни контроллуқиға алғанлиқини елан қилған иди.

 исраилийәниң 7-өктәбирдин буйан ғәззә районида давамлаштуруватқан һуҗумлирида җенидин айрилған пәләстинликләрниң сани 34 миң 789 ға, йариланғанларниң сани 78 миң 204 кә йәткән

игилинишичә, харабиликләрниң астида йәнила миңлиған кишиләрниң җәсәтлири бар болуп, кәң хәлқ аммиси панаһлиниватқан дохтурханилар вә маарип орунлири һуҗум нишани қилинип, аммиви ул-әслиһәләр вәйран болмақта икән.