америка рәфаһқа һуҗум қилишқа қарши икәнликини билдүрди
америка ғәззәдә уруш тохтисун-тохтимисун рәфаһқа һуҗум қилидиғанлиқини елан қилған исираилийә баш министири нетанйаһу һөкүмитини агаһландуруп, «америка рәфаһқа қуруқлуқтин һуҗум қилишқа қарши» дәп байанат елан қилди.
түркийә авази радийоси хәвири: ақсарай дөләт бихәтәрлик учур-алақә ишлири мәслиһәтчиси җон кирби торда өткүзүлгән ахбарат елан қилиш йиғинида, ғәззә вә районниң нөвәттики вәзийити үстидә тохталди.
у исираилийәниң ғәззәдә уруш тохтисун-тохтимисун рәфаһқа һуҗум қилидиғанлиқини елан қилған баш министир нетанйаһуға наразилиқ билдүрди.
у: «рәфаһта кәң көләмлик қуруқлуқ һәрикитини көрүшни халимаймиз. у йәрдә панаһлиниватқан 1 йерим милйон кишиниң бихәтәрликини нәзәргә алмиған бир һәрбий һәрикәтни көрүшни халимаймиз» деди.
у һазирғичә исираилийә тәрәптин рәфаһқа мунасивәтлик бир пиланниң йәткүзүлмигәнликини, американиң ишәнчлик пилан болған тәқдирдиму рәфаһқа қуруқлуқтин һуҗум қилишқа қарши икәнликини қәйт қилди.
у һамасниң ғәззәдә уруш тохтитишқа мунасивәтлик сунулған йеңи тәклипни музакирә қиливатқанлиқини вә өзлириниң һамасниң буниңға беридиған җавабини күтүватқанлиқлирини билдүрди.
у ташқи ишлар министири антони блинкенниңму уруш тохтитиш тиришчанлиқлирини давамлаштуруватқанлиқини әскәртип, урушниң балдуррақ тохтитилишини, әсирләрниң қойуп берилишини вә ғәззәгә техиму көп инсанпәрвәрлик йардәмлириниң йәткүзүлишини үмид қилидиғанлиқлирини қәйт қилди.
