bulghariye besh ming nato eskirini orunlashturghili bolidighan herbiy baza quridighanliqini bildürdi
bulghariye dölet mudapie ministiri todor tagaréf bulghariyening zörür tépilghanda, 5 ming shimaliy atlantik ehdi teshkilati — nato eskirini orunlashturghili bolidighan ul- eslihe qurulushlirini bashlaydighanliqini bildürdi.
türkiye awazi radiyosi xewiri:bulghariye dölet mudapie ministiri todor tagaréf bTV namliq bir xususiy téléwiziye qaniligha bayanat berdi؛ yéqinda emelge ashurghan amérika ziyariti heqqide toxtalghan tagarif, bulghariyede qurulushi pilanliniwatqan nato herbiy bazisi we munasiwetlik ul- eslihelerge texminen 6 milyard yawro etrapida meblegh kétish mumkinlikini otturigha qoydi.
u nato xadimliri üchün teyyarlinidighan bazidin bashqa, tashyol, tömür yol qurulushi we bashqa xizmetlerningmu pilanliniwatqanliqini eskertti.
kéreklik mebleghning amérika, nato we yawropa ittipaqining her xil fondiliri teripidin teminlinidighanliqini bildürgen tagaréf, natoning qararigha asasen yolgha qoyulghan bixeterlik tedbirliri üstide toxtilip: «natoning sherqiy teripidiki (dölet halqighan) barliq jengchi qisimlarni birigada jeng guruppisigha özgertish pilanlandi. bataliyondin birigadagha özgiridighan bu guruppining her biridiki xadimlar sani 5 minggha yétishi mumkin. zörür tépilghanda, bu ish emeliylishidu, emma hazirche bizning buninggha munasiwetlik éniq waqit jedwilimiz yoq. biz bu xil ehwallargha teyyar turushimiz kérek» dégenlerni qeyt qildi.
