hérzog: «israiliye yéngi bir insanperwerlik nuqtisidin waqitliq urush toxtitishqa teyyar»
israiliye pirézidénti ishaq hérzog israiliyelik esirlerning qoyup bérilishige kapaletlik qilish üchün, ghezze rayonida yéngi bir «insanperwerlik nuqtisidin waqitliq urush toxtitish» qa teyyar ikenliklirini bildürdi.
türkiye awazi radiyosi xewiri: israiliye pirézidénti hérzog israiliyediki chet el bash elchiliri bilen körüshken yighinda, küntertiptiki mesililer üstide toxtaldi.
israiliyening hujumida köpinchisi ayallar we kichik balilar bolup, jemiy 20 minggha yéqin kishi öltürülgen ghezzede xelq bilen emes, hamas bilen urush qilghanliqini we rayongha insanperwerlik yardemlerning yetküzülüsh nisbitini ashurushqa tirishqanliqini ilgiri sürdi.
hérzog yéqinqi ikki hepte ichide birleshken döletler teshkilati we bashqa xelqaraliq yardem teshkilatliri arqiliq künige 100 din 125 kiche bolghan insanperwerlik yardem aptomobillirining ghezzege kirgenlikini, bu sanni üch hesse ashurushqa bolidighanliqini éytti.
hérzog israiliye bilen hamas otturisida yéngi esir almashturush kélishimining mumkinchiliki heqqide toxtilip: «men israiliyening esirlerning qoyup bérilishige kapaletlik qilish üchün yéngi bir insanperwerlik nuqtisidin waqitliq urush toxtitish we qoshumche insanperwerlik yardemge teyyar ikenlikini qayta tekitleymen» dédi.
hérzogning bayanatidin kéyin hamas uchur élan qilip: «israiliyening hujumliri astida esir almashturushni ret qilimiz, emma hujumni toxtitish üchün her qandaq teshebbusqa ochuqmiz. zionistlarning tajawuzchiliqi toxtimaydiken, qetiy halda muzakire ötküzülmeydu» dédi.
hamasning herbiy qaniti qassam birigadiliri 7 - öktebir (2023) de israiliyege qarshi «eqsa topani» namliq keng kölemlik hujum qozghighanliqini élan qilghan we buninggha qarita israiliye qisimliri urush ayropilanliri bilen ghezze rayonini wehshilerche bombardiman qilip, «tömür qilich herikiti» ni bashlighanliqini jakarlighan idi.
künséri küchiyiwatqan urush sewebidin 19 mingdin artuq pelestinlik puqra jénidin ayrildi.
