данийәдә муқәддәс китабларға һуҗум қилиш қанунға хилап

түркийә авази радийоси хәвири: данийә парламентида, муқәддәс китабларни көйдүрүш вә бу китабларға һуҗум қилишни қанунға хилап һесаблайдиған қанун лайиһәси авазға қойулди.

данийә парламентиниң 77 әзаси  қанун лайиһәсини рәт қилип, 94 әзаси қобул қилип аваз ташлиди.

мәзкур қанун билән, данийәдә қуран кәрим вә башқа муқәддәс китабларни көйдүрүш, һуҗум қилиш вә диний мәнивийәтләргә мувапиқ болмиған муамилә қилиш мәни қилиниду. бу қанунға хилаплиқ қилғанларға җәриманә қойулиду йаки икки йилға йеқин қамақ җазасиға һөкүм қилинду.

данийә айал падишаһи 2-маргрет қанунниң күчкә игә болуши үчүн тәстиқлиши керәк.

шиветсийә билән данийәдә йеқинқи күнләрдә қуран кәримгә һуҗум қилиш вәқәлири көпийип қалған болуп, һөкүмәтләрниң буниңға рухсәт қилиши қаттиқ наразилиқларға сәвәб болған иди.

данийәниң ашқун оңчи сийасәтчиси расмус палудан 2022-йили паскал байрими бойичә шиветсийәниң малмө, норкөпин, жөнкөпиң қатарлиқ шәһәрләр билән пайтәхт стокһолмда қуран көйдүрүш иғвагәрчиликини давамлаштурған иди.

у 21-йанвар (2023) түркийәниң стокһолм әлчиханиси, 27-йанвар копенһаген әлчиханиси алдида қуран кәрим көйдүргән иди.

стокһолмда әсли ирақлиқ болған салван момика қуран һейтниң биринчи күни (2023-йили 28-ийун) стокһолм җамәсиниң алдида сақчиларниң қоғдиши астида қуран кәрим көйдүргән иди.

салван момика буниң билән қалмай, 20-ийул (2023) да ирақниң стокһолмдики әлчиханиси алдида, 31-ийул шиветсийә парламенти алдида сақчиларниң қоғдиши астида қуран кәрим билән ирақ байриқини көйдүргән иди. у кейинчә техиму һәддидин ешип, 25-26-27- вә 29- авғуст (2023) күнлириму стокһолмниң охшимиған җайлирида сақчиларниң қоғдиши астида қуран кәрим көйдүрүшни давамлаштурған иди.

әсли иранлиқ бәһрам марҗанму 3-авғуст (2023) стокһолмниң ангбайбадет қирғиқида сақчиларниң қоғдиши астида қуран кәрим көйдүргән иди.