америка ғәрбий қирғақта зораванлиқ қилғанларға виза чәклимиси қойидиған болди
америка ишғалийәт астидики ғәрбий қирғақта әвҗигә чиққан зораванлиқларға четишлиқ кишиләргә сайаһәт чәклимиси қойидиғанлиқини елан қилди.
түркийә авази радийоси хәвири: америка ташқи ишлар министири антони блинкен ғәрбий қирғақта тинчлиқ, бихәтәрлик вә муқимлиққа бузғунчилиқ қилған кишиләрни нишан қилған йеңи виза сийаситиниң йолға қойулидиғанлиқини билдүрди.
у ембарго қойулидиған кишиләрниң биринчи дәриҗилик туғқанлириниңму чәклимигә учриши мумкинликини ейтти.
у исраилийәликләрниң пәләстинликләргә вә пәләстинликләрниң исраилийәликләргә қилған һуҗумлириниму өз ичигә алған һалда американиң ғәрбий қирғақтики муқимлиққа бузғунчилиқ қилған барлиқ һәрикәтләргә қарши туридиғанлиқини билдүрүп: «зулум қилғучи йаки зийанкәшликкә учриғучи ким болушидин қәтнийнәзәр, ғәрбий қирғақта пуқраларға қаритилған барлиқ зораванлиқ һәрикәтлирини давамлиқ сүрүштә қилимиз» деди.
у исраилийә һөкүмитиниң ғәрбий қирғақта пәләстинликләргә қаритилған зораванлиқ һуҗумлирини елип бериватқан ашқун йәһудий көчмәнләр үчүн техиму көп ишларни қилиши керәкликини тәкитләп пәләстин пуқралирини ашқунларниң һуҗумлиридин қоғдаш үчүн қошумчә тәдбирләрни йолға қойуш керәкликини билдүрди.
у ахирида, исраилийә вә пәләстин һөкүмитиниң ғәрбий қирғақта муқимлиқни сақлашқа мәсул икәнликини әскәртти.
