makron jemiyet tertipini eslige keltürüsh permani chüshürdi
firansiye pirézidénti makron hökümetke jemiyet tertipini eslige keltürüsh üchün barliq ishlarni qilish permanini chüshürdi.
türkiye awazi radiyosi xewiri: firansiyede aljiriye pushtidin bolghan bir yashning öltürülüshi bilen bashlanghan namayishlar dawamlashmaqta.
tünügün kéche (2-iyul) nantérra shehiride ötküzülgen namayishlarda, 49 kishi qolgha élindi. buning bilen namayishlar partlighan 27-iyundin buyan qolgha élinghanlarning sani 3 minggha yéqinlashti.
léon shehiride, saqchilar yash aqquzush bombisi étip, namayishchilarni tarqitiwetti.
pirézidént makron weziyetni muzakire qilish üchün bash ministir élisabét borné, ichki ishlar ministiri géreld darmaninni öz ichige alghan ministirlar bilen élsiy sariyida körüshti.
u ministirlargha, jemiyet tertipi we xatirjemlikni eslige keltürüsh üchün barliq ishlarni qilish permanini chüshürdi.
u yene, firansiyede yüz bériwatqan ishlarni chüshinish üchün uzun muddetlik tetqiqat xizmetlirini bashlashni telep qildi.
firansiyede namayishlar dawamlishiwatqan bir peytte, jénidin ayrilghan yash naélning chong anisi nadiya firansiye téléwiziyeside namayishchilarni sükütke chaqirdi.
firansiyede 27-iyun (2023) nantérra shehiride saqchilarning üch kishi olturghan bir aptomobilgha oq chiqirishi netijiside, aptomobilning heydigüchisi 17 yashliq naél m. jénidin ayrilghan idi.
naélning ölümige naraziliqini bildürgen kishiler, oxshimighan sheherlerde namayish ötküzüp saqchilar bilen toqunushqan idi.
naélni öltürgen saqchi xizmitidin toxtitilghandin kéyin, sotlash qarari chiqirilghan idi.
parizh, marsilya, léon qatarliq sheherlerde ötküzülgen namayishlarda, magézinlarni bulash weqeliri körülgenliktin, 10 din artuq sheherde shu yer waqti 21.00 din kéyin kochigha chiqish cheklendi.
