байдин пәләстин билән исираилийә рәһбәрлириниң көрүшкәнликини қарши алидиғанлиқлирини билдүрди

түркийә авази радийоси хәвири: ақсарай пирезидент җо байдинниң пәләстин билән исираилийә оттурисида тоқунушларни азайтиш үчүн мисирниң шарм әл-шәйх шәһиридә йиғин өткүзүлгәнликидин мәмнунлуқ һес қилғанлиқи тоғрисида байанат елан қилди.

байанатта билдүрүлишичә, пирезидент җо байдин исираилийә баш министири нетанйаһу билән телефонда көрүшүп, исираилийә-пәләстин мунасивәтлирини музакирә қилған. пирезидент җо байдин тәрәпләрниң дәрһал һәмкарлишип өзара маслишишни күчәйтишни, барлиқ һуҗумларни әйибләшни вә икки дөләтлик һәл қилиш чарәсиниң сиҗиллиқини капаләткә игә қилиш керәкликини тәкитлигән.

у нетанйаһуға демократик қиммәтләрниң америка-исираилийә мунасивәтлириниң муһим амили икәнликини, демократик җәмийәтләрниң һәқиқий тәңпуңлуқ вә назарәтләр билән күчлинидиғанлиқини, түп өзгиришләрниң кәң хәлқ аммисиниң қоллиши билән әмәлгә ешиши керәкликини тәкитлиди.

у исираилийәниң хәвпсизликини қоллайдиғанлиқлирини вә иранниң тәһдитлиригә қарши дөләт бихәтәрлик хадимлири оттурисидики һәмкарлиқларни тәкрарлиди.

икки рәһбәр кәлгүсидики һәптиләрдиму даим алақилишип турушни қарар қилди.

мисир, пәләстин, исраилийә, ийорданийә вә американиң йуқири дәриҗилик сийасий һәмдә бихәтәрлик әмәлдарлири шарм әл-шәйхтә көрүшкән иди.

исраилийә-пәләстинниң җиддийликини пәсәйтиш үчүн уйуштурулған бихәтәрлик йиғинида , пәләстин земинида тинчлиқни қоғдашниң зөрүрлүки тәкитләнгән иди.