ислам һәмкарлиқ тәшкилати алҗирийә билән маракәшкә чақириқ елан қилди
ислам һәмкарлиқ тәшкилати алҗирийә вә маракәшни өз ара келип чиқиши иһтимали болған пикир ихтилаплирини һәл қилишта «диалог тили» қоллинишқа чақирди.
түркийә авази радийоси хәвири: ислам һәмкарлиқ тәшкилати тәрипидин елан қилинған йазма байанатта, алҗирийәниң маракәш билән дипломатик мунасивәтлирини үзгәнликигә даир хәвәрләрниң ислам һәмкарлиқ тәшкилати баш катибатлиқи тәрипидин тәқип қилинғанлиқи билдүрүлди.
байанатта, икки дөләтниң алий мәнпәәтлири вә йахши қошнидарчилиқ принсипини алдинқи орунға қойуши керәклики оттуриға қойулди. тарих вә ортақ мәнпәәт бир йәргә җәм қилған маракәш вә алҗирийәниң ислам һәмкарлиқ тәшкилатиниң актип әзалири икәнлики вә ортақ исламий хизмәтләрдә икки үнүмлүк дөләт икәнлики тәкитләнди.
ислам һәмкарлиқ тәшкилати йәнә, маракәш вә алҗирийәдә оттуриға чиқиши мумкин болған пикир ихтилаплирини һәл қилишта дийалог тилини қоллинишқа чақирди.
алҗирийә ташқи ишлар министири рамтан ламамра түнүгүн елан қилған байанатида, йеқинқи мәзгилләрдә көрүлгән дүшмәнләрчә һәрикәтләр нәтиҗисидә дөлитиниң маракәш билән дипломатик мунасивәтлирини үзүшни қарар қилғанлиқини җакарлиған иди.
маракәш ташқи ишлар министирлиқи тәрипидин елан қилинған йазма байанатта болса, алҗирийә чиқарған бир тәрәплимә қарарниң сәвәблириниң қобул қиларлиқи йоқлиқини оттуриға қойған иди.
