nyu york waqti géziti qashiqji weqesige alaqidar yéngi uchurlarni tarqatti

türkiye awazi radiyosi xewiri: «nyu york waqti» géziti, jemal qashiqjini öltürüsh üchün istanbulgha kelgen 15 kishilik suyiqest etritining biri bolghan we muhim chet el ziyaretliride text warisi shahzade muhemmed bin selmangha hemrah bolidighan seudi erebistan xewpsizlik ishliri emeldari mahir abduleziz mutribning jinayet yüz bérip uzun ötmeyla biri bilen téléfonda erebche sözleshkenlikini xewer qildi.

xewerge qarighanda, mutrib téléfonda isim atimastinla «xojayiningizgha éytip qoyung, ademler ishlirini tügetti» dégen.

nyu york waqti gézitining xewiride, seudi erebistanning bu awaz lintisigha alaqidar xewerlerni ret qilghanliqimu eskertildi.

xewerde yene, ötken ay türkiye ziyariti esnasida mezkur awaz lintisini anglighanliqi bildürülgen amérika merkiziy axbarat idarisi – CİA diréktori gina haspél we bashqa dölet bixeterlik xadimlirining, bu hepte qashiqji tekshürüshi toghrisida amérika dölet mejlisige doklat sunidighanliqi qeyt qilindi.

yene bir tereptin engliye bash weziri tirésa méy qashiqji jinayiti toghrisida bayanat bérip, «tashqi ishlar wezirimiz riyad shehiride, yene bir qétim bu heqte tüz we qayil qilarliq bir tekshürüsh élip bérilishi shundaqla jawabkarlardin hésab sorilishi kéreklikini roshen halda otturigha qoydi» dédi.

engliye tashqi ishlar weziri jérémy hantmu roytérs xewer agéntliqigha bayanat bérip, «qashiqji jinayitide jawabkarlarning qanunning bir terep qilishigha tapshurulushi toghrisida téz bir özgirish bolidighanliqigha ishinimen... riyadtiki uchrishishlirim jeryanida endishilirimizni ochuq halda tilgha aldim. bundaq bir weqening qaytilanmasliqining qanchilik muhim ikenlikini tekitlidim» dégenlerni qeyt qildi.

jemal qashiqji 2 – öktebirde nikahlinish resmiyetlirini testiqlitish üchün kirgen seudi erebistanning istanbuldiki konsulxanisida wehshiylerche bir jinayetning qurbani bolghanidi.