сүрийәдә һамадин тәхминән 80 миң пуқра идлибкә көчүп кәлди
инсан һәқ вә һөррийәтлири, инсанпәрвәрлик йардәм вәқпи «İHH» һамадин көчүп кәлгән пуқраларға йардәм хизмәтлирини башлиди.
түркийә авази радийоси хәвири: инсан һәқ вә һөррийәтлири, инсанпәрвәрлик йардәм вәқпи «İHH»ниң сүрийәдики хизмәтлири медийа ишлири мудири сәлим тосун, сүрийәниң һама шәһиридин тәхминән 80 миң пуқраниң идлиб шәһириниң шималиға көчкәнликини билдүрди.
һуҗум сәвәбидин пуқраларниң интайин қейин әһвалда икәнликини тилға алған сәлим тосун, «һавадин вә қуруғлуқтин қилиниватқан һуҗумлар түпәйлидин һаманиң шәрқидики тәхминән 80 миң пуқра идлибниң шималиға көчти. миңлиған аилә йүрт – маканлирини ташлап, түркийә чеграсиға йеқин җайға йетип кәлди. һуҗум давамлишидиған болса, бу санниң техиму ешип кетидиғанлиқини тәхмин қиливатимиз» деди.
сәлим тосун көчкән аилиләргә қолидин келишичә йардәм қилишқа тиришватқанлиқини тәкитләп, дәсләпки қәдәмдә идлиб әтрапидики кәфәр лусин дегән җайда қаналғу мәркизи қуруп чиқдиғанлиқини билдүрди.
җәмий 10 миң қап йемәк – ичмәк тәййарлап, аилиләргә тарқитип бәргәнликини билдүргән сәлим тосун йәнә мундақ деди:
«чеграниң нол нуқтисида чедир қурған аилиләр асасән қалмиди. һуҗумлар давамлишивиридиған болса, вәзийәт техиму йаманлишип кетиду. һазир мәзкур аилиләр дәрәхт астини панаһ тутти. йолда бешини тиққудәк йәрла тапса, шу йәрдә панаһлинишқа тиришмақта. йеқиндин буйан пәсиллик йамғурниңму әвҗ елиши сәвәбидин йүзлигән аилиниң чедирлири су астида қалди. инсанлар бомбардимандин қечип кәлгән районларда йемәк – ичмәк қейинчилиқиға дуч кәлмәктә»
