пашинйан: әрмәнләр <тарихий әрменийә>ни әслигә кәлтүрүш арзусидин ваз кечиши керәк

түркийә авази радийоси хәвири: баш министир пашинйан әрменийә парламентида парламент әзалириниң соаллириға җаваб бәрди؛ у әрмәнләрниң сақлиниватқан мәсилиләрни һәл қилишқа йетәкчилик қилалайдиған дөләт тәсәввурини һазирғичә оттуриға қойалмиғанлиқини тәкитлиди.

1991-йили мустәқиллиқини елан қилған әрменийәниң, 20 йилдин кейин дөлитиниң қайси нуқтиға йетидиғанлиқини көрситип беридиған бирәр пирограмма түзүп чиқалмиғанлиқиға ишарәт қилған пашинйан, бу мәсилиниң йәнила давамлишиватқанлиқини, әрменийәниң <реал әрменийә тәсәввури>ға моһтаҗ икәнликини ейтти.

у әрменийәниң иҗтимаий писихологийәдики  сақлиниватқан әң муһим мәсилиләрниң бириниң «қолдин кәткән әрменийәни әслигә кәлтүрүш» арзуси икәнликини илгири сүрди вә сөзини давамлаштуруп: «биз вәтән ичидә вәтән издәватимиз. бизниң сийасий учуримиз мана бу. һөрмәтлик пуқралар, әрменийә җумһурийитиниң һөрмәтлик пуқралири! биз <тарихий әрменийә>ни әслигә кәлтүрүш арзуйимиздин ваз кечишимиз керәк؛ чүнки биз бу ана вәтәнгә игә болдуқ. бу ана вәтән 29 миң 743 кивадрат километир игилик һоқуқлуқ земиндин тәркиб тапқан әрменийә җумһурийитидур» дегәнләрни қәйт қилди.