buddisit milletchiler arakan musulmanlirigha yardem yetküzidighan bir paraxotqa hujum qildi

türkiye awazi radiyosi xewiri: birma tashqi ishlar ministiri, qoshumche pirézidéntliq mehkimisige mesul dölet ishliri ministiri ang san suchining ishxanisidin élan qilinghan bayanatta, bezi buddist milletchilerning arakanning paytexti sitwéde xelqara qizil kiris hilal ay jemiyiti xadimlirining arakanliq musulmanlargha yollinidighan yardem eshyalirini paraxotqa yüklishige tosqunluq qilishqa urunghanliqi bildürüldi.

bayanatta, 300 dek buddist milletchining paraxotqa atesh topi étishidin kéyin weqelerning ulghiyip ketkenliki, saqchilarning hawagha oq chiqirish we yuqiri bésimliq su ishlitish arqiliq buddistlargha mudaxile qilghanliqi, weqege chétishliq 8 kishining nazaret astigha élinghanliqi qeyt qilindi.

ismining ashkarilinishini xalimaydighan bir saqchi anadolu agéntliqigha bayanat bérip, bezi hujumchilarning yardem paraxotigha atesh topi atqanliqini, yene bezilirining saqchilargha kaltekler bilen hujum qilghanliqini bildürdi.

igilinishiche, paraxottiki yardemler 25- awghusttin buyan armiye we buddist milletchilirining hujumlirigha uchrawatqan maungdawdiki öy – makanliridin ayrilip qalghan arakanliq musulmanlargha ewetilish üchün teyyarlanghaniken.

25- awghusttin buyan bangladishqa 421 mingdin artuq musulman qéchip keldi.